到咗米蘭,即刻去酒店check in,之後就返中央火車站坐地鐵去DUOMO,入到車廂望望手上的地鐵圖,心想反正今日購物為主,於是乎就係早一個站Montenapoleo落車,因為呢度係名店街.

記得早幾年嚟名店街,成條街靜到,只得我同朋友兩個係度行,車都唔多架.今日再訪,成條街都係遊客,兩旁又泊滿車,唔知係咪咁,所以啲店舖連午休都冇,一直開到7點先關門.

由街頭行到街尾十字路口,行多一條街就係DUOMO,睇地圖好似好遠,其實行過去都好近,由於附近商店林立,成條街都係人,去到DUOMO前的廣場,人更多,仲有人係度集會叫囂(唔知係咪聲討貝老呢,唔敢行埋去睇,費事有起事上嚟走唔切).睇睇吓仲有人舞獅添,唔睇以為係香港.

係DUOMO影完相,就行返去FURLA度買袋,因為之前買過銀包,覺得都OK,又係意大利出產,我睇中嗰個皮袋都係二百幾歐羅唔算貴.佢啲款,通常一個款有幾隻色,我最鐘意係紫色,但朋友話黑色易襯衫,於是索性要求個售貨員攞哂2隻色俾我試吓,售貨員亦攞新的俾我睇,一睇黑色的還可以,紫色那個一攞出嚟,拉鍊位竟然仲有啲線頭係度未曾剪,唔係掛,個袋成265歐羅唔平喎,咁都攞得出嚟,最搞笑係個售貨員好似唔當係一回事咁,朋友就話可能佢覺得自己比LV同BV平,所以質素係咁,就等於我哋嘅餐廳同快餐店的分別,最後就只好買個黑色啦,唔使自己剪線頭嗎,好在啲皮都好靚,都算值嘅.

係意大利,只要係貼有tax free標誌的商店,買滿大約155歐羅就可以退稅,話就話可以攞番好似16%退稅,但因為退稅公司要收手續費,所以實際收回大約11.5%到,而退稅公司都有幾間,唔同商店用唔同的公司,當然唔同公司收的手續費都會有唔同,退稅的詳細情形,可至此文參考.

今次係第1次由米蘭Malpensa機場返香港,去到首先去航空公司櫃位處check in,再同職員講你要做退稅,咁佢就會幫你check in,同埋幫你個行李貼貼紙,之後攞番件行李同boarding pass,再去海關度蓋印,去到海關就問退稅品係邊,我話係個喼度,佢就幫我蓋印,蓋完就叫我將件行李放係行李輸送帶度幫我寄倉,都幾方便,仲以為要返去航空公司度搞添.

搞好手續,第1時間去攞錢,退稅公司個櫃位就係附近,仲有位中國藉的職員係度幫忙解答問題,我就問如果攞現金要唔要再俾手續費,因為之前試過係其他機場的櫃位係要的,職員話唔使,咁就梗係即刻排隊攞啦,袋袋平安唔使等退落信用卡喎.收完錢後想想,之所以唔收手續費,原因可能係佢本身就係個間退稅公司,因為平時要收手續費的都是exchange公司,由於係代理的關係,所以就再收手續費,anyway,總之係攞之前問清楚要唔要手續費就最好啦.

攞完錢見無乜好做,索性早啲入閘,好在早到機場,好多人排隊入閘,人龍好長,打幾個蛇餅,好在我預早3個鐘到機場咋,國際機場即係國際機場,上午10點幾已經咁多人.