係羅馬自助遊內教咗大家點樣揾旅館,通常佢哋都會要你一次過俾哂錢,記得要佢俾返張收據你,雖然只係喺張白紙度寫低日期,房類同金額再加蓋旅館印章,但至少有個證明.記得記住自己房間號碼,因離開旅館時要放低門匙,而佢哋啲旅館通常三班制,上午出去,晚黑回來已是第二個人,佢唔會知你住幾號房,要你話佢知就會俾返條匙你.而離開前亦最好鎖埋嗰喼,因為如果冇鎖,有乜唔見,莫講話旅館,保險都唔賠,不過都係以防萬一啫,咁多年我都係咁買完LV擺入喼度放喺旅館都冇唔見.

依家歐羅匯率高到嘔,去Bar度食個意大利粉唔飲嘢,都要5蚊起,仲唔係好大碟,大食嘅如我真係食唔飽.

先講講我嘅一日三餐點解決,平價旅館早餐通常唔包,就算包都唔好要,請願要求佢平啲,因為多數只得一個麵包,實食唔飽,去麥記食早晨套餐(同香港食物種類一樣)3.1,午餐6.2(飲品可要檸檬茶唔使加錢),至少可以坐低慢慢食,係嗰間Pizza快餐店,午餐亦係6.2,一件Pizza加薯條或水果或蛋糕等任揀,晚餐就買件Pizza3-4蚊或意大利粉拎走返旅館食.

今次我都算叻,見歐羅升到嘔,帶定幾個杯麵去做早餐,慳唔少.

當然,大家亦可以去超級市場度買麵包,火腿冷肉,燒雞(凍嘅)同其他熟食(凍嘅)嚟解決呢三餐,如果有帶爐,晚餐就可以整熱嚟食.唔想整,喺羅馬就可以去我講嗰間小型超市(唔係火車站嗰間)附近有間Bar,買隻燒雞返旅館食都得,其實喺歐洲,呢種燒雞週圍都有得買.

水嗰方面,2公升一支,超市都係買0.5蚊起,唔算貴,好過自己煲,除非你想飲熱水.買鮮橙汁飲,仲抵過買可口可樂,仲有好多唔同種類嘅鮮果汁揀,當水果食又可慳番啲,呢度啲橙肉係紅色嘅,唔好以為壞咗.

想買嘢就要留意,某部份商店會由下午1點開始午休,至3-4點至再開門再營業,大型嘅超市,百貨公司同某啲連鎖店至冇午休,星期日全日休息,某些小型店舖星期一要下午3點至開門營業.通常店舖門口都會貼上營業時間,雖然係意大利文,不過唔緊要,睇時間啫.

博物館同美術館,多數星期一都係唔開.

市內搭乘交通公具,一張票巴士,地鐵同電車共用,記得買咗票至好上車,車上冇得買.搭巴士同電車,上車後記得係車廂內的打票機度打票列印時間,雖然個司機係唔會理你有冇打到張票,但無打票當冇票乘車,查到要罰錢,另外同香港唔同嘅係,巴士至少有2度門,2度門都可以上同落,唔似香港上車同落車各有一度門唔可以錯,同埋要自己按制開門;地鐵就同香港一樣咁入閘.喺羅馬搭地鐵真係好鬼安全,個個站都至少有一個警察企係度當值.

坐國內線火車,散買火車票比用任何一種pass都抵好多,因為有pass坐快車Eurostar Italia,Eurostar Italia AV,EurostarCity Italia都要再補15-20歐羅先坐得,頭等同2等一樣補咁多,但上網買特價都係20幾蚊起,就算唔坐呢類快車,坐慢車價錢都唔貴.

坐地區列車好似佛羅倫斯去比薩,因為網上買冇特價,可以直接去火車站counter買,一定要用紙寫清楚目的地,時間,日期同等級俾職員睇,以免出錯,核對無誤至好離開.唔想排隊可以上網買定,Train Category一定要是R,如是ICplus,票價會貴好多,R即是地區列車,亦只預售7日內之火車票.

國內線同國外線都有特價,如果決定好去留日期,可以好似我咁係香港上網買,編定車票帶埋去,國內線車票可退票或更改,不過要收手續費.

現在國內線特價票分2種 :

一.AMICA : 比正價平20%而最少要10歐羅,適用於ES*City, IC Plus, IC, ICN, Exp, CC, WL(車種係Train Category內可見)之列車,就咁睇好難分,其實只要去到買票之畫面,係fare內按入去,就會出現一系列票種名稱俾人揀.

二.Super -60/Speciale -30/Promo-15 : 顧名思義即是比正價平60%/30%/15%,適用於 AV, AV Fast, ES* or ES* Fast的快車,不過要至少30日前買票同埋售完即止,如果真係買哂又想平的話,可考慮坐地區列車即R,但時間會比快車慢好多,如ROME去FLORENCE坐ES等快車需時1:37,15%折扣要36歐羅,但R只需16歐羅不過就要坐3:42.

上網買完票佢會send email俾你confirm,將佢列印出來帶埋去上火車就得,記得帶埋買時個張信用卡,雖然佢未必睇,不過以防萬一,而個email亦唔好咁快刪除,因萬一唔見咗都可以再print過.國外線特價票叫Smart Prices,但買票後就冇得退同更改,同座位有限,買哂就冇,亦冇得自己print,要去到當地火車站內嘅自助售票機度自行列印取票或搵職員幫忙,網址會教你點做;要留意的是,買國外線列車時,當你揀完smart睇到幾錢都唔代表一定有,你一定要好似買飛咁log in入去,揀好所有再按continue至知有冇得買,有的話網頁會將資料連同座位編號show出嚟(只要按delete就可取消張票),冇就會話你知冇呢隻票種買.

想買票就去佢嘅網頁,要register咗先可買,輸入地點日期時間後按SEND,轉入下一個畫面就會有幾班車俾你揀,揀好你想坐的列車後按continue,轉入下一個畫面,揀Fare:國內線如上面所講選票種;國外線就先揀SMART PRICE 2,無就SMART PRICE 1,都冇就揀SMART PRICE,咁唔好彩都係無哂呢隻特價票,就可以去到先買啦,揀完之後就會出價錢,之後再入人數同等級,日車就Seats descriptions內Mandatory reservation唔使理,隔離可揀Corridor走廊或Window窗口,SEAT NEAR TO....唔使理,TICKET DELIVERY揀第一個(其實佢都已幫你揀好)Ticketless solution with payment receipt delivered by e-mail(no printing on board),買幾多張票都好,name of person travelling都唔使填,按Continue轉入下一個畫面,入埋信用卡資料就ok,要注意係入完信用卡號碼後,下面有個保安碼要入,即是信用卡背面號碼後的數字(一般是3個).之後就好似上面所講收email再自己print.通宵車就JOURNEY PREFERENCES內,係Seats descriptions內揀你想要嘅房類,由C4至單人房都有,揀好床位後,如你係女仔,旁邊就梗係揀Woman啦,SEAT NEAR TO....唔使理,TICKET DELIVERY揀Self Service即去到當地火車站內嘅自助售票機度自行列印取票或搵職員幫忙,之後做法同日車一樣,要留意嘅係房類雖然有好多種俾你揀,但當你揀好哂諗住按Continue轉入下一個畫面時,有你揀個種房當然可以繼續,冇嘅佢至會話We are sorry but the travel solution requested is not available,咁就要按2.Select a different rate on the same train返轉頭再揀過,佢個system真係幾煩,冇就唔好俾人揀啦,攪一大餐先話冇,不過無辦法,唯有耐心啲慢慢揀.買國內線無問題,一買國外線就係咁,有時用用吓又會唔得,叫你try again later,但再試又會ok無問題.而喺意大利週街都有上網店舖,亦可以去到再上網買,不過啲平價票係數量有限.

上網買票要留意,一定要一次過揀選好所有車票後先好去俾錢,因銀行為保障持卡人,同一日內如果用同一張信用卡於同一個網站內分2次俾錢,card center係會唔接受第2次的付款,你要第2日再去買過或用第2張卡先得,而每次最多可買4程,如果買完4程又想再買,就要用第2張信用卡或第2日再去買啦.

呢張就係我自己print嘅火車票,攞住佢上到火車等查票員嚟查就得啦 :

一般國內線列車,如果係eurostar呢類快車,可預售2個月,地區列車(例如佛羅倫斯去比薩)就7日,國外線3個月.

唔同國家嘅國鐵,都會有特價國外線火車票供網上購買,出同入都得,取票方法都係自己print或郵寄,唔怕煩,可去埋網誌內 : 德國自助遊-注意事項  , 法國自助遊-注意事項 , 瑞士自助遊-注意事項睇吓,邊個平再決定幫邊個買,網誌內有教大家點做同佢哋嘅國鐵網址.

夏季熱時,大家都唔好著低胸,短裙,短褲,吊帶衫同涼鞋,因為著到咁,教堂唔俾入,唔諗住入就當然著乜都得.

**最後要提提大家嘅就係,有時喺街度會見到有細路,老婦人或媽咪抱住BB問你攞錢,好似好可憐,但咁嘅情況當然係唔好理行過就算,我唔係話佢一定會搶你嘢,不過小心啲好;好多時行行吓街啲人都會行埋嚟問我識唔識英文,遇到呢類情況,我都係一樣唔理佢行過就算,三九唔識七,有乜好傾呢.**