最好選擇喺火車北站Gare du Nord落腳(有地鐵同RER可坐),因這裡有齊高,中,平價的酒店和旅館,法式餐廳(有些連中文餐牌都有),美式快餐店,日式餐廳,越式快餐店等等,由車站正門行落兩條街有兩間超級市場,火車站地低有自助儲物櫃,但由地鐵係過唔到去,一定要上返地面由火車站內另一通道落,正確位置即是由火車站地面月台出嚟,向右手面行就會見到,內有職員看守和行李要過X光機檢查.可在此搭RER B線往戴高樂機場Aeroport Roissy-Charles de Gaulle,往倫敦的Eurostar亦是由此開出.**酒店可考慮New Hotel呢間2星 - 網頁,好處係喺正火車站對面,一出就見到.亦都可以好似我咁,去到至慢慢搵都得,因同一條街上,仲有好多唔同級數嘅旅館同酒店.**
- 晚餐要試吓佢哋啲生蠔,分1至六號,亦可考慮海鮮冷盤,樣樣有齊,再唔係就叫個扒加枝紅酒慢慢享受.
- 有人話巴黎的地下鐵和RER路線圖好似蜘蛛網咁好難明,其實只要跟住啲顏色線慢慢睇就會發覺好方便,因它四通八達都好方便,不過轉線時往往都要行餐懵.要留意嘅係一條RER線內會再分開去唔同目的地,好似坐RER B去Charles de Gaulle機場,都有2條線去2個目的地,一條去機場,另一條就去Mitry-Claye,睇清楚月台水牌個目的地先好上車.一張交通票巴士,地鐵同RER等共用,地鐵可轉RER但就唔可以轉巴士,一次過購買10程票Carnet de 10 tickets plein tarif平過遂張買,亦抵過買Paris Visite,雖然有証可以免費坐,但1日搭唔倒10程車,同埋佢啲景點好近吓,好似羅浮宮同凱旋門望落幾遠,但直接行去分分鐘同行返落地鐵月台一樣咁遠,原因係有幾條線都會到嘅站,月台間都相隔好遠兼無扶手電梯,上上落落都好辛苦,咁行法不如行過去好過.
- 聖心教堂旁有小型纜車上去,唔想自己行可以用一張交通票坐上去.
- 當你搭地鐵時會發覺好多人都唔買飛,跳或爬過閘口就算,出閘時又會兩個人迫埋一齊過,千萬不要為咗慳嗰小小錢而因小失大,因為週不時都會有一大隊穿著制服或便衣職員係轉車或出閘口的途中查飛,無飛就罰錢,冇得扮唔知,所以謹記買飛和袋好咪唔見,網頁內有哂所有公共交通公具嘅資料,包括去Orly機場同Charles de Gaulle機場.除此之外,法航都有巴士由呢兩個機場出市區,如去Gare de Lyon同Montparnasse呢2個火車站,如要趕火車就最好坐RER,因為可能會塞車;唔使一定要坐法航先坐得,俾錢就得,網頁內有詳細資料,想知多些呢兩個機場嘅資料,可以去網頁睇.
- 坐廉航有時會去Aeroport Paris Beauvais Tille機場,網頁有講點坐車去.
- 坐地鐵轉線時,有時要出閘再入,用返同一張票出入就得,只要睇清楚唔好出錯閘就得,未離開地鐵站都唔好掉張票.
- 商店的開門時間,多數由早上9:00或10:00到晚上7:00或8:00關門(全法國都是).百貨公司如Printemps春天,逢星期四開至10:00.Galeries Lafayette老佛爺,逢星期四開至9:00(內有超級市場).入去前記得睇清楚關門時間再慢慢選購.星期日全部商店休息,某些超級市場和位於旅遊點的商店會照常營業,好似香榭麗舍大道上的LV總店竟然都有開(下午1:00至2:00會關門午休),不過唔知會否只是暫時性質,所以去前最好去佢個網頁查吓,唔係以為我講大話.
- Avenue des Champs-Elysees香榭麗舍大道上店舖林立,但是只得一間LV總店點夠,放心,由大道向羅浮宮方向行至Av. Montaigne街,如不想行到腳軟(因一陣有排行,不過女士們的忍耐力是天下無敵的,只要小宇宙一經發揮),可從George V地鐵站搭一個站去到Franklin D.Roosevelt,記得要喺車頭落,一上到地面就會即時見到Gucci, 接著還有Salvatore Ferragamo, Chanel, Hermes, Prada, Celine, Fendi, Christian Dior, LV.....等等.要記住這裡的名店星期日是唔開的.
- 如想購買LV,應儘量避免前往香榭麗舍大道總店,雖然貨品齊備,但是非常之咁多人,想揾人幫你都難,兼且現在無目錄你睇(其實有不過唔擺出嚟),如果唔記得嗰名都幾難買倒.可考慮前往塞納河左岸ST-GERMAIN-DES-PRES區嗰間,位於地鐵4號線ST-GERMAIN-DES-PRES站,啲SALES好好人,我同朋友都係冇抄低個名,形容咗好耐先知想要邊個,可能因為咁,到我哋話想買銀包,即刻攞哂出來俾我哋揀.
- 無論你是否充滿藝術細胞,都應該買張Paris Museum Pass(inter Musees),分2,4或6日,憑咭可免費前往各個主要的博物館,美術館如羅浮宮,凡爾賽宮,凱旋門,聖母院等(鐵塔唔包),最重要就是不用再浪費時間去排隊買票,隨付的小册子有詳細列明,網頁內有詳情講邊啲免費,去到巴黎先買就得啦,唔使經網頁買.要注意係張pass要連續使用,所以開証前要留意想去的博物館會唔會休息唔開.
- 市郊Chateau de Versailles凡爾賽宮,係太陽王路易十四起嚟做皇宮,加埋花園,大到起碼行1日,
第一次世界大戰結束後,就是在皇宮內的鏡廊簽署凡爾賽和約,坐RER C係Versailles Rive Gauche落車. - 地下鐵2號線和11號線的交匯點站Belleville,是當地的唐人街,有齊各式各樣的餐廳和酒樓,亦有超級市場,越南餐廳都有好幾間,而我就覺得當中有間叫"為平牛粉"係最好食,亦最多人幫襯,不過價錢都唔平.
- 地下鐵4號線Les Halles和RER A,B,D線Chatelet Les Halles(互通的交匯點)有個大型的購物中心Forum Des Halles,內裏有間大型的H&M,出中心向西北方向走,穿過Eglise St-Eustache教堂,見到Rue du Jour街,Agnes b的總店在此.
- 迪士尼樂園網頁.
- 迪士尼樂園隔離有個大型的購物商場,商場內又有間大型的超級市場,好大間有2層;最重要是商場隔離有個Factory outlet : La Vallee Village,不妨去睇睇有冇平嘢執.
- 地下鐵4號線尾站Porte de Clignancourt有個巴黎最大嘅跳蚤市場Marche Aux Puces de Saint-Ouen,只開星期六,日,一3日,網頁內有詳細資料.
- Place de la Bastille巴士底廣場旁都有個賣食物嘅露天市場,即是街市,只開星期四同星期日,上午8點半-1點半.另外喺對岸地下鐵7號線Censier Daubenton站或Place Monge站旁,Rue Mouffetard街是一條好細嘅石板小路,前段係紀念品店同小餐館,後段係一個古老街市,入到去你可以聞到好大陣芝士味,街市晨咁早7點就開,星期一唔開.
- 如想要影得哂成個巴黎鐵塔,就要係地下鐵6號線和9號線的交匯點站Trocadero落車,影完再慢慢行落去.
- 法文Hotel(o字上有個^)除可解做酒店外,豪宅和大型建築物也是叫Hotel的,所以存放拿破崙陵寢的地方叫做Hotel des Invalides,咪以為佢係酒店.
- 法國紅酒和鵝肝世界聞名,可以去超級市場買返酒店試吓.
- Bonjour,跟我讀'磅書',這是打招呼用語,一句旁身就全法國通行.
- 坐RER B去Charles de Gaulle機場時要留意,我試過下午5點零由北站坐入去班車唔係好多人,第二年6點零坐多人到上唔到車,因為人可以迫上去但行李就上唔到,原因係班車途經嘅站係住宅區,即是早幾年巴黎發生騷亂當中一個住宅區,所以好多人搭車返屋企.仲有就係每次都去counter買好去機場嘅車票,但去到機場用張票出閘就差不多次次都出唔到,唔係我問題,因為我見其他人都一樣出唔到,最後當然係一齊跨過就算.
- 酒店同旅館都有免費地圖擺哂出嚟,有埋地鐵路線圖,想攞可以入去扮問價錢時順便攞.
想知多啲法國的資料,可到以下幾個有用的Parisinfo或Paris-France參考.
其他要注意的一般事項,可到網誌內'歐洲自助遊-我得你都得'中參考.
