德國市內交通公具點分,S-Bahn係市內火車如同香港嘅輕鐵,U-Bahn就係地鐵.

唔同城市都會有唔同pass供遊客選用,網頁內亦會提議你經網上訂購,不過呢啲唔係特價飛唔會買哂就冇,所以都係去到先買好啲,網頁內會話你知邊度有得買.以下係一些主要景點嘅網頁,網頁內有哂地址,開放時間,入場費(如需要)等等資料,有些可能唔係官方網頁,只是俾大家參考吓,用嚟預算費用 :-

Berlin柏林另一個旅遊網頁,市內有好多博物館同景點,亦有好多唔同種類嘅pass可供選擇:

• CityTourCard:折扣優惠進入部份景點,博物館等等,包埋免費坐公共交通工具,分48同72個鐘,Berlin AB(Berlin市內)和Berlin ABC(Berlin市內+Potsdam)2種.另一隻CityTourCard Museumisinsel就貴啲同只得72個鐘兼只限Berlin市內,但就可免費進入博物館島上的5間主要博物館(唔包special exhibitions),網頁內有哂價錢同資料等.
• Berlin Welcome Card:用法價錢等等同CityTourCard一樣,唔同嘅係佢嘅折扣無citytour card咁多,但博物館同景點嘅數目就多啲(好似Frensehturm電視塔佢都有),網頁內有哂價錢同資料等.
• 3 Day Museumspass:SchauLUST-Museen:3日內免費進入市內多間博物館,students with student ID就半價,但冇講邊種ID,所以如果你有國際學生証,有理無理都俾埋佢,睇吓買唔買得,網頁內有哂價錢同資料等.
• 如果你只對3,4間博物館有興趣或無諗住會入去睇,可以考慮只買單日交通証,有種group ticket供2-5人,但要3-5個人用先最抵,得2個人就每人買張day ticket抵啲,詳細資料可以去佢網頁睇.

Koln/Cologne科隆 :

• 旅遊-網頁.
• 科隆大教堂Der Kolner Dom-網頁.

Füssen富森新天鵝堡Schloss Neuschwanstein同舊天鵝堡Schloss Hohenschwangau網頁.

Munchen/Munich慕尼黑:

• CityTourCard:折扣優惠進入部份景點,博物館等等,包埋免費坐公共交通工具,分1日同3日,單人同Partner(2-5人),詳情可到網頁睇.
• 如果你只對3,4間博物館有興趣或無諗住會入去睇,可以考慮只買交通証,詳情可到網頁睇.

Heidelberg海德堡 : 有大學城之稱,可到它的旅遊網頁睇吓.

以下介紹一些我未去過,但都值得一遊的城市比大家參考.

Dresden:這個鄰近捷克位於Elbe河旁的千古美城,以藝術聞名,所以被稱為Elbe河上的佛羅倫斯,遊柏林時可抽一日時間到此一遊,詳情可到它的網頁睇.

Bonn波恩 : 旅遊網頁.它是貝多芬的出生地,每年9月至10月初都會有音樂會,出年2009年3月同4月仲會有個special concerts,有興趣可以去網頁睇,想參觀大師的故居,可以去網頁參考.

Stuttgart : 旅遊網頁.對車有興趣的話,可以去Benz博物館參觀,詳情可到網頁睇,或Porsche博物館,網頁.

希望以上資料可以對大家有幫助,會繼續update其他城市資料,有問題歡迎留言指教.

或者可以去德國旅遊網頁睇吓其他城市資料.

由於要前往新天鵝堡,在這裡落腳會比富森方便,至少住宿和食店的選擇都比較多.

從Hauptbahnhof中央火車站向前行,當然亦可選擇坐地鐵或電車前往,大約行20分鐘,便可到達市中心的 Marienplatz瑪利亞廣場,每年聖誕節,廣場便會化身成露天市集,吸引各地遊客前來參觀.廣場上的Neues Rathaus新市政廳,可進入市政廳內部參觀;大樓上有個設計獨特的Glockenspiel壁鐘,11月-2月每日上午11和12點,會有壁鐘表現,3月-10月會加開下午5點,不過Good Friday會暫停.廣場四周有百貨公司和餐廳.

從中央火車站坐地鐵U1或U2線於Fraunhoferstrasse站落車,或坐市電S1,2,4,5,6,7,8線於Isartor站落車,行5分鐘,便可到達位於Isar河上島的Deutsches Museum博物館,以工業發展和技術為主,如是男性遊客或讀理科的人士就萬勿錯過,對我而言,當然是.可前往它的網頁查詢有啲乜睇.

從瑪利亞廣場坐地鐵U6線於Frottmaning站落,行大約5分鐘,就會到達Allianz Arena,這個Bayern Munchen拜仁慕尼黑和TSV1860 Munchen FC1860慕尼黑兩隊的共用主場.

從瑪利亞廣場坐地鐵U3線於Olympia-zentrum站落,便是1972年時的奧運會場,現在是一個大型公園,園內有座高塔,可搭乘電梯上頂觀看整個公園.

公園隔壁便是豪華房車BMW的總部,有興趣可到它的博物館參觀.

除此之外,當然還有每年九月尾至十月頭嘅啤酒節和其他旅遊點,想知多些資料,可到它的網頁查詢.

到達目的地-忘憂宮,第一時間落車感受吓,初時真係好開心,打開對手等啲雪慢慢飄落嚟然後溶化,感覺大自然真是奇妙,漸漸發覺啲雪喺個頭頂同塊面度溶化時,才感到陣陣刺痛兼好鬼凍,只好攞條頸巾包到密(好似飛虎隊)嚟保暖.

去到忘憂宮,凍到連花園個噴水池都結冰,可想而知啲水有幾冰凍,但啲天鵝同鴛鴦仍然喺度遊水,真係唔知係佢哋生命力頑強定係我無用.

去到花園另一面,便是新宮,原本打算行入去影相,但啲雪差不多有成呎厚,免強行入幾步,啲寒氣已經由腳板低度開始慢慢滲透入來,真係凍到入心入肺,唯有打退堂鼓,反正個宮都無開入唔倒去.

至此才發覺原來落雪都唔係咁好玩,依家自己就好似一塊放咗喺雪櫃嘅凍肉咁,忘憂事小,最緊要忘記寒冷.

歐洲間間皇宮都咁大,皇帝同皇后喺入面唔知會唔會迷路,就算唔迷路,由宮頭行到去宮尾都腳軟啦.

歷盡滄桑,才能把它合而為一,故此政府便大灑金錢,大興土木,務求於最短時間內,儘快將它脫胎換骨,而世界各地的企業家亦趕緊到來設立據點,一齊將它打造成超級國際大都會.

離開火車站來到威廉教堂前的公園,從這個現代化的雕塑-柏林環回望,一方面你會感受到戰爭帶給世人的禍害,另一方面會更覺現代化的建築物充斥著整個城市.就連物價都十分現代化,即是非常之高,啲嘢貴到買唔落手,都好,可以慳番.

想睇古舊建築,就要去到勃蘭登堡大門附近才能找到真正的古城風貌.

手持一日交通証,搭乘為遊客而設的100號線巴士,沿著Unter den Linden大道往前走,沿途隨意上落唔駛自己行幾寫意.

來到電視塔,當然要上塔頂感受吓大地在我腳下的感覺,塔內每個角落,均會放置一張城市的舊照,好等遊人可作出新與舊的對比.

由柏林坐RE1可以直接去到Park Sanssouci Bhf,呢度1408958-timetable.pdf有開出站名同time table俾大家作為參考,詳細資料係呢個網頁都搵到http://www.vbb-fahrinfo.de/hafas/query.exe/en.

Schloss Sanssouci忘憂宮,是Frederick the Great皇帝的夏季行宮,到此玩樂當然可以忘憂,皇宮前的梯形花園,不過因為冬天所以無哂啲花草樹木,啲外國人可能會覺得設計相當獨特,不過啋,真係大吉利是,好似去咗墳場.花園前的水池凍到結冰,但啲天鵝同鴛鴦一樣喺度遊水無有怕,因為啲羽毛夠保暖,我都有著羽绒,仲加埋羊毛低衫,但一樣凍到震騰騰,當然啦成地雪,花園的遠處,就是Neue Palais新宮,是皇帝打勝仗為咗顯示出自己的國力而起嘅,鬼叫佢係皇帝,那怕有藉口,就算冇,亦可以起乜都得.

Chinesische Haus中國屋,你會發覺啲雕像一啲都唔似中國人,原因是他們根本未去過中國,亦未見過中國人,只是憑空想像,所以會有不論不類之感.

有興趣想再知多啲,可到此http://www.spsg.de/網址找資料.

呢個http://www.potsdam-tourism.com/pages/tourist_information.html係波茨坦市嘅旅遊網頁,內有市內其他景點介紹.

消失,無咁易,更要留番少少喺度吸人啲遊客嚟觀光,就在火車東站Ostbahnhof附近,.

100號巴士線是為遊客而設,由動物園車站S+U Zoologischer Garten Metro去到亞歷山大廣場站S+U Alexanderplatz Metro,沿途經過大部份的旅遊點,買埋張Berlin Welcome Card柏林咭,便可隨時上落,兼可享折扣優惠於某些博物館,餐廳等等,亦可只買一日交通証,詳情可到此網址查詢http://www.bvg.de/index.php/en.巴士沿途會經過 :

Kaiser-Wilheim-Geda Chtnis-Kirche威廉一世紀念教堂遺跡,教堂於1943年被轟炸破壞後不作修葺,用以警惕世人戰爭的禍害,故此在旁邊另外興建一座設計新穎的教堂,柏林環象徵團結一致.

Berliner Dom柏林大教堂.

Reichstag新國會大廈天台的圓頂.

Berliner Rathaus紅色市政廳.

最後來到Frensehturm電視塔,是昔日東柏林的地標,高約365公尺,無畏高的話,可搭升降機上展望廳觀看.

位於郊區的Schloss Charlottenburg夏洛特堡,是Friedrich III皇帝為Sophie Charlotte皇后所建的夏季行宮.當時啲皇帝,起皇宮和堡壘,好似玩積木咁,話起就起.

有興趣可到此網址http://www.berlin.de/tourismus/查詢資料.

遊德國,坐火車係最方便同快捷,有啲仲有優惠 :

• 德國分成好幾個唔同聯邦,國鐵有種叫Lander-Tickets嘅1日証供2-5人用,持証可1日內任搭所屬聯邦內嘅local trains(Interregio-Express, Regional-Express, Regionalbahn, S-Bahn),亦有單人票.如打算一日內去所屬聯邦內好幾個城市兼有5個人就真係抵到嘔.不過就算一個人用都抵,當然要睇吓去邊,例如慕尼黑同富森新天鵝堡同是Bavaria/Bayern聯邦要坐Regional-Express火車去,買呢張Tickets抵過散買火車票或用Pass,而呢隻拜仁邦票仲包括埋去奧地利嘅Salzburg;又例如柏林去波茨坦坐S-Bahn就唔好買啦,買柏林市交通証抵好多.詳細資料可以去網頁睇,網頁內亦會叫你經網上訂購,但呢種唔係特價票唔會買哂就冇,所以最好去到當地先買,係自助售票機買平過係counter買些少,唔識可以問人.至於聯邦點分,可去 - 德國旅遊局網頁 或 Wiki 度睇.至於點至知時間表內邊班車可坐,只要先在網頁內check時間表,有結果後再按入去,就可看到是什麼種類的列車,如下圖 :再根據時間班次上車就得啦,千萬別上錯EC即Eurocity,如果上錯就要補錢啦.
• 國內同國外線上網買都有特價,但就數量有限,要買就越早越好,同埋唔可以更改同退款,可以去
網頁買票,入好日期時間同地點後,Travellers內,如你有2-5人,可按Add travellers加人,加人後國外線會要你入埋年齡,國內就唔需要,隔離No reduction唔使理,按Search connection轉入下一個畫面,就會show幾班車出來俾你揀,Chg.0即是唔使轉車,揀好你想坐個班車之後,按價錢下面Check availability就會轉入下一個畫面,show哂你揀個班車的資料同原本正價是多少錢,當然可以揀過另一個價錢,揀好就按Book selected offer或按Purchase轉入下一個畫面,就係你的order summary,某些路線價錢已包括reservation,冇包嘅佢會問你With定Without,如果驚冇位坐,可以揀With俾多2歐羅,Type of delivery for the ticket佢已幫你揀好自己print,當然可以改郵寄(不過要另外再俾郵費),對過冇問題,按Proceed轉入下一個畫面揀位,如果唔使揀位,就會直接去到下一個畫面,如是國外線,佢會問你使唔使book酒店,唔使就去下面,揀Booking without registering,按Continue to book rail joruney without hotel轉入下一個畫面,輸入個人資料(無論買幾多張票,只需輸入信用卡持有人的資料),tick哂Your identification......內兩個格,tick咗credit card後,下面Online-Ticket ID number就入信用卡號碼(用來做身份証明),Your payment details內再入同一張信用卡資料(用來俾錢),Card vertif...即是信用卡背面號碼後的數字(一般是3個).入好哂後按Continue就大功告成,等佢send email俾你之後print出來,出發時緊記帶埋張print out同買票張信用卡,去到就可以依時上車.至於個email,就玩完返來至好delete,萬一唔見都可以再print過.
• 唔同國家嘅國鐵,都會有特價國外線火車票供網上購買,出同入都得,取票方法都係自己print或郵寄,除咗意大利(入去嘅火車票取票方法得兩種,郵寄-但只限國內,或去火車站取-又係只限國內火車站,即是出境可上網買,入就唔得,因為攞唔到),唔怕煩,可去埋網誌內 : 荷蘭自助遊-注意事項 , 法國自助遊-注意事項 , 瑞士自助遊-注意事項 , 意大利自助遊-注意事項二 ,比利時自助遊-注意事項睇吓,邊個平再決定幫邊個買,網誌內有教大家點做同佢哋嘅國鐵網址.

其他要注意的一般事項,可到網誌內'歐洲自助遊-我得你都得'中參考.

天呀,點解我會選擇自己行上去.

行咗一陣已發覺條路雖然唔崎嶇,但是又長又斜,所以都幾辛苦,但已勢成騎虎,只好死頂,唔通行返落山坐馬車咩.

真係一講曹操,曹操就到,即刻有架馬車從我身邊經過,車上的遊客又同我say hi,我唯有扮到好enjoy咁同佢say hi,其實我不知幾想俾錢叫車伕載埋,可惜已經滿座.

參觀完要離開時已經腳軟軟,今次無咁笨,死人都坐馬車落山,正所謂上山容易落山難,呢個藉口雖然免強咗少少,不過要我又行-咪攪.

再經過埋呢次慘痛教訓,以後真係無升降機,多過200級樓梯都唔好預我,除非有特別原因.

離遠已可看見位於半山上的它,山腳下可選擇坐馬車還是徒步上山,如果你和我一樣是一個坐在office養尊處優的OL,不要慳,一定要坐馬車上山,否則只會後悔,你可能會話我嚟得自由行就預咗會行到腳軟,但既然有得選擇又何必辛苦自己對腳,坐馬車都算幫助它的旅遊業,何樂而不為呢.不過最後我竟然選擇咗行上去,所以後悔嗰個係我自己.

城堡入口,城堡內金碧輝煌,記得要入內參觀,你可能會發覺點解張床咁細,大概只得5呎長,唔通以前啲人好矮,錯,聽講是因為以前啲人是半臥式地睡眠,唔係成個趴喺度,真定假呢,定係驚有人嚟行刺時可以走快啲呢,以前啲皇帝,大多數都好大喜功,好似起呢座城堡的Ludwig II路易二世,在位41年起咗三大城堡(除它外,尚有Scholss Herrenchiemsee 和 Linderhof Palace)真係要識分身至住得哂,這樣浪費老百姓的血汗錢,梗係驚激起民憤.參觀完又唔覺腳軟可沿山路行去相中這道橋,就能影得哂整座堡壘,我無去因為已經腳軟(平時去shopping行足一日就ok無腳軟).所以影唔倒,離去時至識得坐馬車落山,真係傻瓜.

和它相對的Hohenschwangau舊天鵝堡,由於它的名氣,人氣和size無咁大,所以比較冷清,有時間可順道參觀.

**新天鵝堡現正進行維修,預計直至2010,外圍全被杋布包住,當然仍可進內參觀.

位於萊茵河畔的科隆Koln,有間世界第四大的教堂,真的大到無法可影得哂,唯有免免強強影個正門就當到此一遊.

大部份教堂的圓頂均會開放給人們登臨參觀,當然它也不例外,而我當然唔執輸,咁遠來到,無理由真係影完相到此一遊就走,況且行樓梯有幾難啫,我又唔係七老八十.

行咗好耐,開始有啲腳軟感覺,點解仲未到頂,想話停低休息,大家都知條樓梯是螺旋式,真係闊得去邊,我又大件,停低只會阻住後面啲人,只好一邊喘氣一邊頂硬上,迎面有兩個鬼佬參觀完行返落嚟,仲笑笑口同我say hi,為咗慳番啖氣兼唔想蝕咗度氣,唯有笑吓就算,心諗唔衰得,你上到我無理由捱唔到.

噢,終於都到啦,oh my god,原來只是個中途站,係我面前仲有條大約六層樓高的鐵梯等緊我上,到咗依家無理由打退堂鼓,唯有繼續,以為上到梯頂就到,點知第二條螺旋梯正在等待著我,仲要係一望無際,看不到盡頭,對我呢啲坐慣office嘅OL嚟講,咁行法,簡直就係一場惡夢.

好彩,惡夢醒啦,終於都到啦.雖然辛苦,但可以看到整個科隆市和萊茵河就在我腳底,哈哈,都算值得.

參觀完諗住原路離去至發現,原來出口係另一面,唔可以行錯(看守員會阻止),怪不得剛才個鬼佬笑得咁古怪,原來他半途而廢覺得唔好意思.

落到樓下睇番至知,原來有成509級樓梯,怪不得好似行極行唔完,兼行到腳軟.

經過呢次慘痛嘅教訓,我同自己講,以後一定要睇清楚有冇升降機,要行幾多級樓梯,至決定上定唔上,哈哈,都係留番啲腳骨力行街shopping好過.

如有興趣,可到此網站www.koelner-dom.de查詢它的資料.