第一次到來只是忽忽的到訪,短短兩日走馬看花,沒能深入探索,故此今次決定停留5日,讓我慢慢細味這個有"多瑙河上的明珠"和"東方巴黎"美譽的古城,是否只是文人多大話,名過其實.

再次踏足這個城市,令我想起紀念冊上的兩句詩,正是"桃花依舊笑春風,人面全非相映紅".

"桃花依舊",景致沒有太大改變,唯一改變便是已經步向民主的匈牙利,當年部份地方或建築物,仍殘留一些具有共產色彩的裝飾物,到了今天,已經差不多全部被移走,就像相中位於多瑙河畔佩斯區的Pesti Vigado演奏廳,當年門前的這個裝飾物,今天已被換走.

而其他地方,如鐵鍊橋上的獅子像,就依舊向著世人咧嘴微笑.一切一切彷彿沒有改變,其實卻在不知不覺間物換星移.

"人面全非",倒是事實,嗚嗚嗚,咪就係我老咗好多囉.錯,應該是成熟兼穩重咗,不再是傻吓傻吓嘅黃毛丫頭.

來到布達佩斯的火車西站,你會讚嘆建築師融合地將新和舊的結合在一起,而更令我讚嘆的當然是,它的美景絕不比其他西歐國家遜色,但物價相對地卻比它們低廉,怪不得各地遊客均蜂擁而至,可能因為這個原故,當我喺餐廳用膳後,埋單時通常我都唔俾貼士TIPS,但個侍應生見我無俾,竟然開口問我攞,重以為我會識聽匈牙利話,講多兩講見我無反應,仲要好似好無奈咁做埋手勢俾我睇,而我亦只有好無奈咁俾貼士佢,真係縱橫歐洲咁多間餐廳,第一次遇到這種情形,想慳啲都唔得.

不過好在,除咗呢個貪心嘅侍應生外,當地市民都非常友善.

去到漁人堡,你會看見有好多婆婆手持自家製的手工刺繡在叫買,如果你是打算幫襯至好行埋去睇,我就八八卦卦走埋佢望,個婆婆就同我講兼加埋手勢向我表示"佢織到手指頭都痛,坐好遠車至嚟倒,今日未發市,好可憐",其實我仲可憐,都唔知佢講乜,但又要好似好明白咁點哂頭,俾反應佢,最後當然敵唔過婆婆的哀求而買咗張大枱布,她猛向我躬身道謝,但又唔會打蛇隨棍上sale我買多啲.其實只是區區幾十蚊,對我嚟講只是小數目,但她就非常之滿足,所以買完見到婆婆咁開心,哈哈,我突然覺得自己好似做咗小天使咁.而其他人都好守秩序,至少唔會一窩蜂迫埋嚟或跟住叫你幫襯.

身處這兒,發覺自己都尚算幸運,至少還有一份安定的工作,暫時不用為兩餐煩惱,但是世界時刻在變,今日唔知明日事,將來無人可預計,所以積穀防饑是重要,不過及時行樂就更重要.

溫泉-市內有幾個溫泉泳池可供人們暢泳,當地市民一得閒就會約埋三五知己一同前往,就像我們去公眾泳池一樣,有些市民更會自備一副國際象棋,一邊浸泡一邊下棋,比較我哋啲阿伯去公園下棋,更加消遙自在.提提大家,它不像日本的溫泉,如打算幫襯,記得要帶備泳裝.

• 而最大眾化又最多人光顧的便是位於人民公園內的勝齊呢溫泉,已有百多年歷史,黃色的外觀特別耀眼.
• 而最豪華的便是附屬於Danubius Hotel Gellert吉力酒店內的吉力溫泉Gellert Furdo.
• 網頁內有哂市內所有溫泉資料.

鐘乳石-它可算是鐘乳石的寶庫,有興趣可前往參觀:

• 比較方便前往的是位於城堡山下的Varbarlang-Budavari Labirintus,持布達佩斯咭有折扣優惠,和吉力酒店旁的Sziklakapolna.
• 尚有兩座遠離市中心位於老布達區的Palvolgyi Barlang,英文;Szemlohegyi Barlang,只得匈牙利文.兩個都係持布達佩斯咭免費,有興趣可以send email問吓使唔使預約.

若果睇完以上兩樣天然資源都未夠的話,可以再欣賞埋人為的表演,坐地鐵M1線到Vorosmarty Ter站的Budai Vigado劇院和Opera站的國立歌劇院Operahaz,欣賞幾場藝術表演,幫自己增加番啲藝術細胞,詳細資料可以去http://www.opera.hu/index_e.php?lang=en&module=main_eng睇;如果唔諗住睇表演,只想入內參觀,詳細資料可以去網頁睇.

搭地鐵M2線在Kossuth Lajos Ter站落車,上到地面便會看見這座紅色圓頂的國會大廈Orszaghaza,可參加導覽團進內參觀,詳情可以去網頁睇http://www.parlament.hu/angol/angol.htm.

從這裡出發,開始漫步,亦可選擇坐2號電車遊覽.一路向前行,便會看見鐵鍊橋Szechenyi Ianchid,它是第一條把布達和佩斯連繫在一起的橋樑,兩邊橋頭的兩側,均豎立著兩頭栩栩如生的獅子像,一路行一路回望鐵鍊橋和對岸的城堡山,可惜中間俾條電車路軌隔住,,再往前走便是伊莉莎白橋Erzsebet Hid,從橋邊遙望對岸的女神像Liberation Monument.行到此處都應該腳軟,係時候坐低休息,再唔係可繼續向前至綠色鐵橋時至入中央市場搵食.

搭地鐵M1線到英雄廣場站Hosok tere,一出站便會看見它,廣場正中央是建國千年紀念柱

廣場後方是市民公園Varosliget,是當地市民最愛的休憩地方,因內裏有齊餐廳,城堡,動物園,溫泉泳池,遊樂場,博物館等等,一家大細來到,足以消磨一日時間.由此路進,便是Vajdahunyad Vara城堡,城堡最低嗰層是餐廳,記得要坐近湖邊,一邊食一邊欣賞周圍景色,餐廳價格亦算合理.圍繞著城堡的小湖,城堡內的Magyar Mezogardasgi Muzeum農業博物館,Jaki Kapolna教堂.

Szechenyi勝齊尼溫泉泳池,哈哈,嗰名喺咪譯得好啱聽,網頁內有哂市內所有溫泉資料,http://www.spasbudapest.com/tartalom.php?idx=13.

去旅行的最大樂趣,便是一路觀光兼一路shopping,唯一美中不足便是若果買到一袋二袋,影相時會比較不便,不過千金難買心頭好,睇啱唔買唔通等第日至番嚟買咩,雖說間間紀念品店所販賣的物品都是大同小異,但唔等於一定會一模一樣,睇啱又認為價格合理就好買啦.

坐地鐵M1線到這個站,一上地面便是這裡最熱鬧的街道-華西街Vaci U.,這兒是商店密集的散步道,亦有銀行和找換店,唔怕無錢,最多的店舖是販售手工刺繡的商店,所以最好行完再決定幫襯邊間,直行到尾去到綠色鐵橋Szabadsag Hid,就會看見中央市場Nagy Vasarcsarmok,唔講仲以為係火車站,這個兩層高的市場,地下是街市,可以喺度買番啲紅辣椒粉做手信,包裝相當精緻,二樓是商店和食店,可以食完嘢再慢慢行,因這兒商店所販賣的物品同華西街的差不多,買得多仲可以講價,不過華西街就款式多啲和靚啲,但各人的品味不同,或者你會認為市場賣的比它好,所以才會提議行完再決定幫襯邊間.從二樓望返落地下街市,人潮絡繹不絕.

估唔估倒呢度係乜,地鐵站月台,唔似呢.

多瑙河將布達佩斯一分為二,河的左岸稱為布達區,主要的觀光點就是位於山上的城堡區Var-hegy,除可坐巴士上山外,亦可選擇在山腳下鐵鍊橋前坐纜車上山.從纜車站出來,向左手邊行穿過這道門,便是皇宮,皇宮內有Magyar Nemzeti Galeria國家畫廊,進內可參觀哥德時期的木雕和版畫,文藝復興時期和巴洛克的藝術品,19-20世紀時的繪畫和雕刻品等等.Budapesti Torteneti Muzeum布達佩斯歷史博物館,進內可參觀皇宮面貌,發展皇宮的圖解,古時的兵器,日用品等等,和Ludwing Muzeum洛域博物館,進內可參觀匈牙利和其他國家的現代美術品.持布達佩斯咭均可免費參觀.喜歡的話,在此更可遠眺整個佩斯區.

而從纜車站向右手邊行,便是馬提亞斯教堂Matyas Templom,色彩鮮艷的鑲嵌屋頂,是它的特色,春季至秋季的晚間,教堂內會有演奏會.教堂前方的Kulturinnov紀念像.

教堂的另一面,便是Halaszbastya漁夫堡,傳說是漁夫為了防禦外敵而興建,真定假就無人知,若是真的話,咁以前啲人都幾有趣,花這麼多心思,時間和閒情起座咁靚嘅城堡嚟對抗敵人,還是起一座城堡同去街市買菜一樣咁簡單??????在城牆內行走,可觀賞沿途景色.

如果有時間而你又喜歡逛博物館,其實圍繞著城堡山尚有Semmelweis Orvostorteneti Muzeum醫學歷史博物館,Zenetorteneti Muzeum音樂史博物館和Hadtorteneti Muzeum軍事歷史博物館等等,持布達佩斯咭均可免費參觀,

離開城堡山往前走,會看見Gellert-hegy像,是紀念這位被暴徒從山丘扔下多瑙河的傳教士而興建.

雖然佢已加入歐盟,不過依家仍然用緊自己貨幣,就係Forint,可以去到當地銀行對換,可用歐羅,英鎊或瑞士法郎等歐洲貨幣對換,港幣係無得換,對換時唔好換太多,最好計清楚大約要用幾多錢,因為用唔哂攞返去銀行換會蝕差價.

插頭同西歐一樣,兩腳圓頭,230V.

機場叫Ferihegy,點樣搭車進出,網頁有哂資料.

主要火車站有3個,就係位於佩斯嘅東站Keleti Pályaudvar,北站 Nyugati Pályaudvar同布達嘅南站Déli Pályaudvar,所以搭火車離開時要睇清楚,不過去錯都唔怕,因有地鐵相連,想查火車時間,可去網頁睇,火車票就去到先買都得(如果無買eurail pass).

夏季可考慮從奧地利的維也納或斯洛伐克的布拉迪斯拉法坐船前往,順道遊覽多瑙河,不過都唔平兼依家有Eurail Pass都冇折,詳情可以去http://www.mahartpassnave.hu/睇,佢仲有埋於布達佩斯市內遊覽多瑙河嘅資料同價錢.

它的主要旅遊點比較分散,最好買張Budapest Card,用完後可留為紀念,一咭在手,可以免費任搭所有公共交通工具,不用每次買飛,兼享折扣優惠於某些博物館,溫泉泳池和餐廳等等,有部份博物館仲可以免費進入,詳情可以去http://www.budapestinfo.hu/en/budapest_card睇.

唔買card自己坐車都得,地鐵,巴士,電車等資料,可以去網頁睇.

喜歡聽歌劇和演奏會,這兒亦是一個不錯的選擇,至少比西歐便宜,當然惠顧由旅遊局推薦的會比較有保證.網頁http://www.hungariakoncert.hu/內除咗有音樂會資料外,仲有自助午或晚餐加遊船河資料.

喜歡飲葡萄酒的話,可到酒莊參觀和試飲.

如有興趣浸溫泉,市內亦有數個溫泉泳池可供選擇.

至於喜歡工藝品的朋友,就一定要買返啲手工刺繡品做手信,有衫,枱布,手帕等等各式各樣.

以上所有資料,均可到網頁查詢.

住宿方面唔使驚,一出火車站,就會有好多人埋嚟向你推介民宿或旅館,仲有相睇,當然會唔會貨不對辦就唔知,所以最好諗清楚.

肯俾多些少錢嘅,可以試我住呢間4星酒店Hotel Victoria,間間房都係落地玻璃同對住多瑙河,黃昏同清早時簡直靚到筆墨不能形容,而佢附近仲有好幾間酒店,不過呢間係最平,位於地鐵M2線Batthyany ter站,出站後行3-5分鐘,亦可坐有軌電車,上車後第一個站落,有興趣可以去佢網址睇吓http://www.victoria.hu/.

或者可以去呢個叫Easy Hotel網頁睇吓,佢標榜自己的酒店平靚正,係Basel同Zurich,英國London同Luton,匈牙利Budapest都有分店,冇嘅都可以幫你search,有興趣可以去http://www.easyhotel.com/home.htm

如果想知多啲我的遊覽經歷,就要睇埋雙城記啦.

除此之外,尚可到匈牙利西部的夏季渡假勝地巴拉頓湖Balaton.

一般要注意的事項,可到網誌內'歐洲自助遊-我得你都得'中參考.