要睇風車,就要去Zaanse Schans風車村,從火車站坐市郊火車,於 Koog-Zaandijk站落車,沿著標誌行15分鐘便到,或者可跟住隨風飄來的芝士香味慢慢前往.

穿越這道橋便是風車村,離遠已可看到一座座風車隨風轉動,有興趣當然可以坐上觀光船遊覽,

村內景色優美,小橋流水,令人有如回到中古世紀.每間小屋均有不同的手工藝工場在內,如芝士工場和木屐工場等等,當然唔小得有紀念品出售,進入風車村是免費的,除非是內進風車參觀才要收費.

除此之外,還可到全世界最大的鮮花拍賣市場Aalsmeer參觀,但此處要收入場費,可從火車站坐172號巴士前往.

常常看見旅遊節目介紹的芝士交易市場Alkmaar,只在四月中至九月中的每個星期五早上才有;可於火車站搭火車前往.

參觀傳統漁村,可從火車站前的公車總站,坐110,112,113或116號前往Volendam.

運河猶如蜘蛛網般,從Centraal Station中央火車站開始向外伸展,整個城市均被它包圍著,利用大大小小,不同的橋樑將運河與陸地連結在一起.

雖然火車站附近是紅燈區,但是最好在此落腳,方便坐火車到鄰近城市作一日遊,亦可於晚上前往紅燈區參觀,記得在區內不可影相和小心爬手.

I Amsterdam Card又係一咭傍身,可免費搭乘市內的巴士和電車兼免費進出多個主要的博物館和美術館等等,分24,48和72小時.如你自問是一個藝術家,每個館都會仔細欣賞一整日,獨立購買入場票會比此咭便宜;如和我一樣,到過兼繞場一周,睇完最重要的名畫或藝術品,每館hea兩三個鐘已係極限,最好就是購買48小時咭,第一日先前往Museumplein廣場參觀內裡的Rijksmuseum國立博物館,內有荷蘭另一藝術家Rembrandt Van Rijn林布蘭的Night Watch,Stedelijk Museum市立博物館和Van Gogh Museum梵高博物館,可從火車站坐電車2號往Nieuw Sloten方向或5號往Amstelveen Binnenhof方向於Van Baerlestraat站落車便是.第二日去埋其餘想去的免費地方,咁就抵哂.

可能你會發覺,點解我會成日寫埋啲當地文法或英文喺度,原因係可以令大家易啲找到目的地,唔使烏烏吓.好似我咁,只知荷蘭有個名畫家叫梵高,啲人話佢有精神病,傻到割咗自己隻耳朵,但佢畫嘅畫卻成日以天價售出,真係唔知你痴定佢痴,當中有一幅叫"繁星".又好多年前和朋友去唱K,朋友話要唱Vincent,我至知呢首開頭就唱Starry Starry Night嘅歌名原來係Vincent唔係Starry Night,當然大家唱完就算.直至我去到梵高博物館,睇介紹至知原來佢嘅全名係Vincent Van Gogh,"繁星"即係Starry Night,原來首歌係唱佢.

從火車站向前行,有間Febo快餐店,內有一部自助食物機,食物一格格排列著,睇啱入錢後,便可開啟小門取出食物,都幾好玩,不過全部均是炸的.再向前行便是Dam水壩廣場,廣場四周當然有地方Shopping啦,連購物中心都特別啲.

再向前行,去到位於Koningsplein廣場和Muntplein廣場間的一段Singel街,是個鮮花市場,唔買,都可以去睇吓啲色彩繽紛嘅鮮花.

如果想遊船河,可到火車站前的碼頭購票.

從火車站坐13或17號電車於Westermarkt站落車,便到達Het Anne Frank Huis安妮之家,就係之前新聞報導砍唔砍棵栗子樹嗰間,現在是博物館,有興趣可到她的網頁查詢．

想知多些資料,可到網頁睇吓,有埋I Amsterdam Card資料.

唔打算買Eurail pass,想散買火車票時,有幾點要留意 :

• 想買國內線火車票,可到國鐵網頁,check定時間,順便睇吓有無特價,冇就可以去到當地再買.
• 去比利時有特價,可以自己print,詳情可去網頁睇.
• 去法國同德國都有特價,但唔可以自己print,佢會郵寄俾你,詳情可去網頁睇,但去法國,似乎喺法國國鐵網頁買仲平,又可以自己print,方便得多,而德國價錢就差不多,所以買之前可以去睇完再決定,網誌法國自助遊-注意事項 , 比利時自助遊-注意事項同德國自助遊-注意事項 有教大家點做同佢哋嘅國鐵網址.
• 去英國都有特價,但要喺比利時布魯塞爾轉Eurostar,既然係咁,當然係玩埋比利時至去啦,如果真係有興趣,可以去上面個網頁睇.
• 要注意嘅係,特價票數量有限,要買就越早越好,同埋唔可以更改同退款.

阿姆斯特丹Schiphol機場-網頁有哂進出資料.

而它境內有三分之一嘅土地係處於水平線之下,風車和木屐,就成了人們的必需品,風車是用來抽乾低地的積水,依家當然已經退役,變成遊客參觀和影相的地方.而木屐當然是用來防水和潮濕,依家亦變成遊客嘅必買紀念品.

現在,單車才是荷蘭人的必需品,所以全國均有完善的單車路和標誌,如果你唔怕辛苦,都可以租番部嚟代步;不過租單車時記得要仔細檢查清楚,唔係有乜意外,攪到樂極生悲就無謂啦.

大部份荷蘭人亦能說流利嘅英語,唔使驚溝通唔到,只怕你同我一樣,哈哈,就係唔多識講.

這裡的旅遊資訊中心嘅標誌係VVV,唔係I,好易認.

雖然它的國旗係紅白藍三色,不過橙色才是他們的代表,所以國家足球隊嘅球衣都係橙色.

除此之外,你又知唔知,它可說是全世界最開放的國家,大部份不被世人認同的事物,在這裡均變成合法.

1. 對性開放:紅燈區內,一間間俗稱"金魚缸"的房屋,讓妓女在此合法地營業,但是謹記不可拍照;除此之外,在阿姆斯特丹更有兩家以性為主題的博物館供人參觀.
2. 對大麻開放:不只有大麻商店,連大麻咖啡店和大麻酒店都有,亦要在這些地方購買或吸食才是合法,但要注意,coffee shop才是,cafe是真正飲咖啡的地方,咪入錯.
3. 對同性戀開放:01年成為首個讓同性戀婚姻合法的國家.

有興趣,可到它的網頁找資料,有中文,不過英文資料會詳盡些.

其他要注意的一般事項,可到網誌內'歐洲自助遊-我得你都得'中參考.