自從歐盟成立到全面使用歐羅後,就更加方便,至少唔使每去一個國家,都要走去銀行或找換店對換當地貨幣.而更方便就當然係,好多國家都免簽証,真係想去就可以即刻去.

如果打算去1個月以上,唔使考慮,出發前,買定張Eurail Passes,用來坐火車穿洲過省,方便得多.

但是如只去十多日,就要考慮係出發前,上去每個國家嘅火車公司網址度(網址可於http://www.eurail.com/1_railway_information找到),查詢單程票價錢.由於有特價關係(比正價平一半或更多),散買分分鐘抵過買Passes;但要注意嘅係,數量有限,售完即止,所以要盡早購買;即時用信用卡付款;買咗後所有資料都冇得更改,票可以退,不過錢係攞唔返.**可到[歐洲自助遊注意事項三:點樣搭火車同買火車票],有詳盡講解.**

以下是針對一些,只去一至兩三個國家和十多日嘅行程而設:-

1. 第一站柏林,留3日,去埋波茨坦;第二站布拉格,留5日,去埋鄰近城市;尾站克拉科夫,留4日,去埋鄰近城市和即日來回去埋華沙,就唔使又換酒店.最好坐德國漢莎,因法航暫時只有機到華沙.
2. 同上,不過尾站改去維也納,咁就坐任何一間航空公司都得.可考慮即日來回去埋隔離斯洛伐克嘅Bratisiava.
3. 第一站布拉格,留5日;第二站布達佩斯,留3日;尾站維也納,留4日.
4. 第一站慕尼黑,留3日,當然去埋新天鵝堡,唔係嚟做乜;第二站薩爾斯堡,留4日,可即日來回去埋煙斯堡;第三站維也納,留4日,行程同上;尾站布達佩斯,留3日.
5. 第一站阿姆斯特丹,留3日;第二站布魯塞爾,留3日,去埋鄰近城市;尾站巴黎,留6日,咁就大把時間觀光同shopping.如果唔想留咁耐,可改留3日,再坐Eurostar去倫敦,留3日.
6. 第一站蘇黎世,留2日;第二站琉森,留3日去埋英格堡或鐵力士峰;第三站煙特力根,留3日上埋少女峰;尾站日內瓦,留4日,去埋伯恩同蒙特勒.
7. 第一站雷恩,留2日;第二站,坐巴士去聖米歇爾山,留3日;第三站,由聖山坐巴士去聖馬羅,留3日,去埋康卡爾;尾站,當然返巴黎啦,留4日,慢慢觀光同shopping.
8. 第一站威尼斯,留3日,去埋維羅納;第二站,米蘭,留2日;第三站,佛羅倫斯,留4日,去埋比薩同類近城市;尾站,羅馬,留4日,唔留咁多日點shopping.

以上咁多種行程,都係俾大家作參巧之用,有些地方,可能你會覺得留得太耐,原因都係唔想太過趕頭趕命,各位可因應自己喜好同時間,再增加或減少.

最後提提大家,如揀坐法航,因為來回程都要喺巴黎轉機,所以可以從尾站先坐飛機返巴黎,出去玩2-3日後,再走都得.

有啲國家,因為我都未去過,所以介紹唔到個行程俾大家參巧.

到最近收到網友留言查詢,雖然唔多,但都好開心,原來真係有人睇,總算無白費心機.

首先講講西班牙加葡萄牙行程,如已確實行情,可預早於網上購買機票,如法國航空,荷蘭航空和德國漢莎航空,於網上購買均有特價,唯一不好便是付款後如要取消,就要俾大約1000蚊手續費,不過好處便是付款後,如往後加價亦不用補回差額.有一點要注意便是,每年年尾,歐洲都會有罷工情況出現,聖誕節亦是他們的旺季,而一月就常常有天氣反常如大雪或大雨,所以最好避過這些時間前往.

最好當然是里斯本入,巴塞隆納走,因為西班牙斷估都多嘢買啲.

第一日到達里斯本,最好於Rossio區安頓,因是市中心兼接近旅遊點和購物區,安頓後,即刻坐火車到仙查遊覽,前往仙查的火車站叫Lisboa Entrecampos,位於Rossio區內.

第二日去Belem區參觀亦唔使太早起身,因為冬季啲旅遊點開9-10點,早去都冇用,亦可早啲去影相,區內有間叫Pasteis de Belem的餅店,記得入去坐低飲杯咖啡食件撻,順便欣賞吓佢啲獨特裝潢;參觀完可返回酒店附近觀光和購物.

第三日當然要去Lisboa Santa Apolonia火車站度寄存行李先啦,之後再到Alfama區,Baixa區和Rossio區觀光;食完晚餐再坐車回火車站,等候坐夜車去馬德里.用三日時間嚟遊覽就唔使趕來趕去,當然亦可因應自己喜好增加或減少.

第四日一早去到Madrid Chamartin火車站,首先要坐地鐵去市中心搵酒店安頓,亦可豪啲坐的士,連埋行李費大約二十幾蚊歐羅左右.如打算坐早車前往塞維亞,最好於Museo Nacional Centro de Arte reina Sofia蘇菲亞王妃藝術中心附近落腳,因接近阿度查火車站,去塞維亞的AVE高速火車便是從這裡出發;在這兒有幾間Hostales平價旅館可供選擇,要注意它的平價旅館,是位於一座大廈內的其中一層,可於對講機內按鍵要求開門便可(好多歐洲城市都是這樣).而藝術中心隔離間唔記得4定5星酒店地下有間餐廳,可於此食到我講嘅"油炸鬼".亦可考慮前往地鐵Gran Via站嘅Avenida Gran Via街附近投宿,這兒嘅平價旅館更是多不勝數,兼接近旅遊點和購物點.

馬德里附近尚有幾個城市值得參觀,除了我介紹過嘅塞歌維亞外,還有中古世紀的城市Toledo,El EScorial內的世界文化遺產之一嘅Royal Monastery of San Lorenao de El Escorial聖羅倫佐修道院,和有大學城之稱嘅Salamance;可因應自己喜好選擇去哂,唔去或去一兩個.用兩日來作馬德里市內觀光,再用兩日時間去這幾個城市.

第八日一早坐火車去塞維亞,如我之前所說,最好係猶太區Santa Cruz找酒店落腳,兼可在附近欣賞埋Flamenco.如已決定邊日由邊度坐夜車往巴塞隆納,最好買埋火車票,因只得一個臥車廂,滿座就要成晚坐住嚟睡.用這裡做據點再前往周邊的城市,就唔使日日執行李搬嚟搬去,最好去Sevilla San Bernardo火車站坐火車,因這兒附近有間大型超級市場.在這裡停留三日,一日市內觀光,另外兩日用作周邊的城市遊覽,除了我所介紹過的城市外,尚有回教之都Cordoba哥多華.

第十一日攞埋行李,一早坐火車前往格拉那達,將行李放於火車站內的行李儲物櫃後,就坐的士前往阿爾汗布拉宮La Alhambra,最好帶定乾糧前往,宮內無乜餐廳可醫肚,遊覽完後再落山食午餐,食完就周圍逛至夠鐘坐夜車為止.

第十二日一早就抵達巴塞隆納Estacio Barcelona Central-Sants火車站.如我之前所言,於林布拉斯大道搵旅館投宿,坐的士於地鐵Liceu站落車便是.

這個只是我自訂嘅行程,每個城市究竟應留幾多日,當然可因應自己喜好來決定.如果時間充裕又是坐法航經巴黎轉機返香港的話,可考慮早兩日坐機返巴黎玩完,買LV兼買埋手信,再坐機返香港.

講完行情應該講吓使費,跟足行程的話,散買火車票會比買火車証便宜,因為可以簽信用卡,所以不用帶此現金前往.酒店可簽信用卡,但有些平價旅館未必得,不過都是很少數的,可預大約60歐羅一間雙人房一晚.早餐約4歐羅或以下;午餐如食快餐,約7歐羅,如去餐廳品嚐,大約15-20歐羅;至於晚餐,可於超級市場買食物返酒店開餐,不過唔好食咁多,因為時差問題,這個時間食嘢,等於係香港嘅消夜,返嚟後有排戒.再預15歐羅嚟做零用錢坐巴士同地鐵(如果唔買旅客証),買水飲和買嘢食,即是每日要用56-69歐羅咁上下,雖則好似預得太多,不過預多些少唔使驚冇錢唔知點算,假設旅館可以簽卡,即是每日要用26-39歐羅現金.至於火車票價,博物館和美術館等嘅入場費,旅客証費用,可預先上網查詢來預留金錢,check完後便知要帶幾多現金前往,如果怕現金危險,可購買旅行支票.

一早到達酒店或旅館時,可先查詢價錢,如覺得合適,可要求先行觀看房間才作決定租住與否;如房間未可進入使用因尚未執搭好,此時可要求他給予地方來放置行李.

其餘細節,可於我其他的網誌內參考.

最後要提提大家,在家靠父母,出外就要靠自己,如有陌生人搭訕,最好唔好理佢,雖然咁做好似有些少拒人於千里之外,但係好似廣告話劑,壞人係冇樣 睇,亦唔會係個額頭度寫住,為自身安全著想都要咁做.