遊羅馬,至少要3日,隨你喜好.

如果真係無藝術細胞(好似我),梵諦岡博物館可以唔入都得,買本旅遊書或博物館門口買本書,已經有好詳盡講解同圖片,清楚過自己親身睇,當然只是我個人見解.

不過聖彼得大教堂嘅鐘樓頂就一定要上,當年我見有lift搭唔使自己行樓梯咁辛苦,即刻第一時間撲埋去俾錢入,上到去見到以為到咗,原來仲有條路行上去相中嘅圓頂,你可以沿鐵絲網行望番下面的教堂內部同影相(如果冇畏高),影圓頂天花壁畫,由教堂望上來係乜都睇唔到.不過呢處只係中途站,仲有一條又長又斜兼團團轉嘅路上圓頂觀景台,來到呢個地步,無理由唔上埋去,於是同朋友一齊上,條路好窄,有人落時就要企埋一邊,行到一處比較闊嘅地方時,我朋友竟然話頂唔順唔上啦,係處等我叫我自己上.到我上到去回完氣行完影完相,諗住落返去,點知個守衛話落去要行另一邊,呢邊只準上,真係my god,竟然忘記咗,通常圓頂都係上落唔同地點,頭先見到有人落,原來都係頂唔順打退堂鼓,我朋友仲係中段等緊我,諗住等個守衛行開鼠入去,佢又死都唔走,唯有死死地氣行落去,又行上去搵埋朋友又落番去,不停轉同行真係頭都暈兼腳軟.

西班牙廣場後面座山度有個Villa Borghese(地圖入面俾個SHOPPING TOUR阻住嗰個),內有博物館同一個好大嘅公園,可以係Termini前個巴士站坐910號巴士去,可以問吓司機邊度落或見到舊城牆就落車,行入去就係,去到盡頭Pincio係觀景台,另一個可以望哂成個羅馬加梵諦岡嘅好去處,即是相中最後面,行落去就係Piazza del Popolo廣場,廣場旁有兩座一式一樣嘅教堂,當地人叫佢做雙子教堂,由教堂中間向前望,又會見到嗰座白色蛋糕Monumento a Vittorio Emanuele II紀念堂,沿Via del Babuino街行,又可以去番西班牙廣場,沿路兩旁都有些特色商店.

呢個係官方旅遊網頁,有興趣可以去睇吓.想搵交通資料,去到網頁按Rome welcomes you再按trasportion再按 When in town就有哂地鐵巴士等資料.如果唔想行路或自己坐車,可考慮坐觀光巴士遊覽,有幾條線可供選擇,係網頁按Bus再按Bus 110 City Tour就有哂所有資料.

如果第一次嚟,可考慮買張ROMA PASS,詳情可去意大利資訊和旅遊點網頁睇吓. 

呢個係地鐵同巴士公司網頁http://www.atac.roma.it/

Roma/Rome羅馬 :

• Musei vaticani梵諦岡博物館-網頁
• Basilica di San Pietro聖彼得大教堂內鐘樓頂-網頁
• 如果打算睇博物館同美術館,可考慮買張Roma Pass,3日20歐羅,包埋市內免費坐巴士同地鐵等公共交通,唔係就諗清楚先好買,如同網誌所講,好多景點行路去都得,要注意只是頭兩間先免費,之後嘅只得折扣優惠,梵諦岡博物館同聖彼得大教堂內鐘樓頂唔包括在內,可以去-網頁睇吓有邊啲係你會去嘅,再去呢個-網頁,入面有其餘景點入場費資料,揀最貴兩間免費入.網頁會叫你即時係網度訂購,真係想買亦唔使經網上訂購,因呢啲唔係特價票唔會買哂就冇,所以可去到當地再買都得,網頁內會話你知邊處有得買.**不過如果第一次嚟都值得買,用來去鬥獸場至少唔使去到排隊買飛,再加埋去Museo e Galleria Borghese博物館同免費坐3日車,都好抵.**
• Museo e Galleria Borghese博物館-網頁,入面除咗有佢啲資料外,尚有市內幾間博物館同美術館資料,詳情可以去睇吓.
• 佢有2個機場,Fiumicino是國際航班同內陸機都有,最方便就係坐每30分鐘一班嘅特快火車,35分鐘就去到Termini火車站; Ciampino主要係內陸機,巴士火車都有,詳情可去-網頁睇,有哂2個機場資料.
• 市郊有個outlet叫Castel Romano,不過想去一係自己揸車,一係就幫襯佢嘅shuttle bus,或者坐地鐵B線去到尾站Laurentina再轉的士,所以有時間就去啦,可以去-網頁睇吓.
• 市郊Tivoli鎮內有個Villa d'Este別墅,花園內有過百噴泉,有時間可以去睇吓,網頁有哂詳細資料

Milano/Milan米蘭 :

• 米蘭地標大教堂Duomo-網頁,上教堂頂可以望哂周圍景色,上到時唔好以為到咗,仲有條路可以再上更高,上到去可以近距離影教堂嘅尖塔.
• 名店街位於Via Monte Napoleone街,可坐地鐵於S.Babila站落,或由大教堂行去,呢度都有間LV,無大教堂旁嗰2間咁多人.
• 最後的晚餐位於Santa Maria Delle Grazie教堂內,網頁內有地圖,一定要預約先可以睇,預約就去呢個網頁.
• 買內陸機票時,好多時會去Bergamo機場叫Orio al Serio,唔係Malpensa或Linate,巴士公司-網頁,入面有哂由以上3個機場出米蘭市區嘅方法同時間表等等.
• 瑞士Mendrisio有個factory outlet叫Fox Town,開星期一至星期日-網頁,如果撞正星期日嚟到米蘭冇地方去,可以考慮跟tours去,網頁有哂詳細資料,或自己坐火車去到再轉巴士.

Firenze翡冷翠/Florence佛羅倫斯 :

• Duomo(B. di Santa Maria del Fiore)大教堂-網頁
• Galleria degli Uffizi烏菲茲美術館-網頁

Pisa比薩 :

• La Torre di Pisa斜塔-網頁

• 前往比薩,可由佛羅倫斯坐地區列車去,因為網上買冇特價,可以直接去火車站counter買,一定要用紙寫清楚目的地,時間,日期同等級俾職員睇,以免出錯,核對無誤至好離開.唔想排隊可以上網買定,Train Category一定要是R,如是ICplus,票價會貴好多,R即是地區列車,網上亦只預售7日內之火車票.

• Basilica di San Marco聖馬可大教堂-網頁
• 面具節-網頁
• 佢嘅機場叫Aeroporto de Venezia Marco Polo,買內陸機票有時會去Treviso個機場叫Canova,呢個巴士公司-網頁,有哂進出呢兩個機場嘅巴士資料.

Verona維羅納,網頁內有哂各景點嘅資訊,當然包括埋Casa di Giulietta茱麗葉之家.

Genova/Genoa熱那亞 :

• Acquario di Genova水族館-網頁
• 旅遊網頁

Torino/Turin都靈旅遊網頁

Napoli拿波里,網頁內可選擇英文或中文,不過係簡體字.如對考古有興趣的話,可以拿波里為據點,去附近Pompeii龐貝古城, Ercolano, Boscoreale, Oplontis, Stabia5個小鎮,網頁有齊資料.

我喺旅遊人生討論區度,見到有人post咗個在羅馬,佛羅倫斯同威尼斯,由中國人開的B&B,我就未住過,因為玩完返嚟至見到,而我多數淡季去唔怕搵唔倒平旅館,兼且我唔鐘意住大房,如有興趣可去此網頁睇吓.

終於都遊完我的最 : 意大利.

意大利:直情係我第一最愛,所以每當聽見有人話佢治安差,都會儘我所能幫佢平反.

可惜治安唔差環境差,舊年年中,已經聽聞拿玻里因為堆填區選址問題,搞到周街垃圾冇人理.

到今年一月中,開始落實細節問題時,原本打算由羅馬1日來回去拿玻里玩,好在喺我買火車票前,剛好報紙又有報導,先知原來問題仍未解決,垃圾越積越多,有啲地方仲臭氣沖天,唯有取消唔去.點知早排聽新聞,問題依然未解決,未解決,仲搞到有間米芝蓮都有介紹嘅餐廳要結業,唉,搞到幾時呢,好在得拿玻里係咁,雖然Firenze都周街垃圾,好在都只限於火車站行去巴士站條街,同埋只係啲人冇公德心,唔係冇堆填區,唔該大家去到唔好有樣學樣,亂拋垃圾.

今次再訪意大利,最好就係有部數碼相機,想點影,影幾多都得,唔靚又可以取消再影,更好仲係,係又影唔係又影,影埋影埋,放入碟度就得,連曬相錢都慳番.

之前都有講,物價同幾年前差不多一樣,如果唔係美金搞到歐羅匯率狂升,我就可以做個大豪客,唔使樣樣慳住使.

唯有望強美金再次兼快啲出現,將歐羅壓番落9蚊都好呀,如果去到8蚊就仲正.

好在都俾我喺羅馬間三越度,用半價買咗個飛'luck'雞毛銀包,之後又喺THE MALL度,用3折價錢買咗個過季嘅大大個shopping bag,雖然過季,勝在大路款,用嚟返工都唔錯,兼且小人用呢個牌子,冇乜A貨,總好過買個LV返嚟,周街都有人用,真假一齊,撞到七彩.

以前歐遊,總覺得咁遠嚟到,無理由唔食西餐,頂多都只會食一兩餐中餐,今次見到中國餐館,簡直想頒個獎俾佢,因為同西餐廳比,實在太便宜,特別係Firenze嗰間中式快餐店,炒飯只係1.9歐羅,仲平過香港,我屋企樓下同公司附近啲茶餐廳要成30蚊港幣,早餐要22,點解依家啲嘢咁鬼貴.

今次旅程,仲揀咗兩處比較冷門嘅地方 :

• 熱那亞 - 因為細個睇過套萬里尋親卡通片,知道呢個地方,去到海港區時,真係好似有種尋親嘅感覺,成條街都係中國人開嘅店舖.
• 都靈 - 因為祖雲達斯關係而認識,去到又真係比我撞到祖雲達斯,可惜影唔倒相.

之後再折返VIA PO街繼續向前行,唔使怕悶,因街道兩旁全是有蓋購物長廊.

直行到尾 ,就是PIAZZZA VITTORIO VENETO廣場廣場前方,就係FIUME PO河

過橋後,山上有座MUSEO NAZ. DELLA MONTAGNA博物館,於山上,可欣賞到ALPS阿爾卑斯山脈,而博物館嘅詳細資料,可到之前介紹嘅網址度睇

而橋嘅盡頭就係GRAN MADRE DI DIO教堂

教堂後面,有個星期日開嘅露天市集,除咗衫褲鞋襪手飾外,仲有傢具.

如果大家係意大利球迷,又撞正有賽程時,行過5星級酒店時,最好望多兩眼,點解咁講,首先喺西那坐巴士返翡冷翠時,等開車期間,睇見有架大巴停喺隔離間5星酒店度,跟住見到啲應該係球員嘅人落車攞行李入酒店,但望極無個識,所以無理.今次嚟到都靈,星期六早上經過P.SAN CARLO廣場時,離遠見到有架大巴停正喺間5星級酒店前,心想坐得巴士嚟又冇球迷聚集,無謂浪費時間望.到下午5點幾回頭時,見到好多人圍住,行埋去八吓乜事,行到埋去,就見到停咗喺度,嘩,袓雲達斯喎,即刻行埋去等埋一份,如果影到迪比亞路,查斯古特,尼維特或保方,可以返嚟威吓,冇嘅話,求其影幾個都好,只見身旁啲女仔係咁嗌迪比亞路,佢就係入面接受記者訪問同影相,嗌極都唔見行出嚟,最後只係企係玻璃門後揮吓手就算,離咁遠,塊玻璃門又有些少茶色,點影,揮完手後仲坐咗升降機返上樓,而啲人同架巴士又唔走,梗係又繼續等,等咗兼吹咗成個幾鐘風都唔見出嚟上巴士走,唔知等到幾時,饑寒交迫之下,佢唔走唯有我走,影底架巴士算啦.夜晚睇電視時,至知當日佢哋贏咗羅馬2:00,原來連羅馬王子都嚟埋.係佢哋嘅官方網頁http://www.juventustore.com/.

而過咗馬路,就係P.zza Castello廣場, 由廣場中間VIA GARIBALDI街直落至VIA XX SETTEMBRE街交界(圖中星位置),就係祖雲達斯嘅專賣店.

附近嘅舊市街 同建築物

佢有為遊客而設嘅Torino+Piemonte Card,幾乎所有嘅博物館都可以免費進入,當然可以免費坐埋巴士,地鐵,電車等嘅公共交通工具,除此之外,鍾意食朱古力嘅朋友,可以買埋chocopass,詳細資料,可去佢個旅遊網址度參考http://www.turismotorino.org/index.php?id=510&navCmd=reset.

火車站前公園沿著旁邊嘅有蓋長廊一路行一路shopping,就可以去到Piazza San Carlo廣場,廣場前有兩座外觀相似嘅教堂,名叫San Carlo同Santa Cristina.教堂正面.,於教堂前回望火車站.

廣場兩旁,係商店同咖啡店.咖啡店全部坐落於舊建築物內,記得入去參觀吓,而由1點零鐘開始,有啲仲會擺小食係bar枱前,只要幫襯飲杯酒精類飲品,就可以免費任食,當地人叫aperitif;店內亦有當地最出名嘅朱古力賣,賣相好靚,但好貴,所以我都係去咗超市度買特價兼香港冇嘅牌子做手信就算,平好多. 雖然得5度,但無香港咁寒冷, ,除咗廣場外,隔離橫街都有好多古舊建築物

佢嘅英文叫TURIN,同意大利文寫法差好遠,訂機票時,重以為係兩個唔同地方,差啲被佢考起.至於中文名,有啲就會譯做拖連奴或杜林.

市中心有兩個火車站,Stazione di Porta Nuova新門同Stazione di Porta Susa蘇沙門.

最好當然係喺新門火車站度落腳,因為近旅遊點,又係行路去就得,慳唔少車錢.

出火車站轉左,過咗馬路後第一個街口,即圖中手寫X係往機場嘅巴士站位置,隔離嗰O就係售賣機場巴士車票嘅商店位置,門口亦會好大隻字寫住Sadem(巴士公司名稱),記得買咗至好上車,如果上車至買要俾多1蚊.呢度除咗有去機場嘅巴士外,仲有往市郊嘅巴士,我就係買完飛出嚟,見好多人拎住行李係度等,於是乎又等埋一份,有巴士到,又跟人一齊搬啲行李入車底嗰行李位,好在我慣常上到車都會再問司機確認一下,一問至知上錯車,去機場個站唔係呢度喺後面,於是乎要即刻落車搬番啲行李出嚟,幾瘀.呢張地圖,係火車站入面嘅旅遊資訊處( i )度,問路時俾嘅.

而出火車站轉右過馬路,沿VIA NIZZA街行落第一個街口,係VIA SAN PIO V街度有間3星酒店,位於舊式建築物和獨立一座,不過入面一啲都唔舊,第一次自己入去問,見到呢位接待員姐姐,雙人房連浴廁60蚊一晚,但係雙人床我唔喜歡所以走人,點知隔離啲3星仲貴,要成100蚊,唔想再行,唯有返轉頭,見反正入住就叫埋朋友拉喼入埋去,佢聽見我講嘢,先知原來大家都係中國人(哈哈,我竟然以為佢係日本人),我見自己友,當然打蛇隨棍上叫佢平啲,無問題,55蚊一晚包埋早餐,跟住就緊係話想要兩張單人床嘅房啦,都無問題,不過依家未退房,下午返嚟就有,之後當然係放低啲行李係接待處度勞煩佢睇住,拍拍屁股錢都唔使俾住就走咗出去玩啦.我哋住嗰間房,仲有個好鬼大嘅露台.走嗰日因為坐下午6點機,原本諗住將啲行李寄存喺火車站啲儲物櫃度,起碼要10蚊一個,依家可以慳番(又係擺底勞煩佢睇住),幾好,佢哋個網址係www.hoteltavernadantesca.it.

喺酒店行返出去,沿CORSO VITTORIO EMANUELE II街行落去(唔係向火車站嗰邊),有間中國人開嘅日本餐廳自助餐下午9.1唔包飲品,晚餐十幾蚊(唔記得),除咗壽司外,仲有鍋貼,小籠包,生果,蛋糕等等,.

餐廳斜對面就係超級市場.

基本上,由旅館出嚟,是但走入一條橫街直落,都可以去到海港區,不過我選擇行返出火車站,再沿車站旁Via Andrea Doria街一直行,直至見到有條樓梯,行落去會有間叫China House嘅中國餐館,亦可以行到嚟呢處至落,回望半山上嘅房屋,如果有間係我嘅就好囉.

而我當晚都光顧咗China House食晚餐,我見反正外買兩客意大利粉都要7.5,不如幫襯吓自己人,一個炒飯,一碗湯麵,一碟炒什菜加一碟青口都係13蚊,最緊要係有杯熱騰騰嘅中國茶飲吓.

講番落到去之後,由China House起嘅整條街,都係中國人開嘅商店,連旅行社都有,當然唔少得有專買中式食品嘅超市啦.

亦可過咗馬路沿海散步

似唔似魔盜王隻黑珍珠.

呢度仲有間全歐洲最大嘅水族館,,水族館連埋呢個觀鳥館,去齊就無咗幾嚿水,.

溜冰場

幾多遊艇泊哂係度

係歐洲,成日都會見到啲老師,帶住啲學生周圍去參觀

Via XX Settembre大道兩旁店舖林立,仲有間麥記,長廊式設計,就算落雨都唔怕,

而由Via Dante直行到尾,就會見到Casa di Colombo哥倫布故居,

沿著故居旁呢度城門行番過去,就可以去番Piazza de Ferrari廣埸啦.

由旅館出發,沿Via Balbi街落番去,沿途見到呢個類似水井嘅物體,可選擇向旁邊嘅橫街窄巷內穿梭,亦可行番出Via Balbi街繼續前行亦得,而街上有座皇宮,有興趣可以去參觀.

繼續向前行至尾,會有間教堂,向前行入Via Cairoli街直至尾,就係Via Garibaldi街,街上有兩座宮殿,白色嘅Galleria di Palazzo Bianco同佢對面紅色嘅Galleria di Palazzo Rosso,兩座都係美術館,除咗呢兩座宮殿外,街上尚有無數古舊建築物,不過全部俾啲私人機構如大銀行租咗嚟做辦公室.

繼續前行,去到Piazza de Ferrari廣埸,廣場內有個大型噴泉 由廣場旁斜路行落去,會見到Piazza San Matteo廣場,黑白相間係熱那亞樣式嘅特別設計,由呢條橫街直行,就可以去到Palazzo Ducale宮,內進有展覽廳同餐廳.

由宮前嘅Via San Lorenzo路向前行,就會嚟到Cattedrale di San Lorenzo聖羅倫佐大教堂,內裡展示著據稱是耶穌基督在最後的晚餐時使用嘅聖杯.

離開教堂後,轉入去啲橫街度亂行亂撞,就會搵倒超級市場行同街市.

終於明白點解街上嘅某些公共或私營機構嘅設施,例如玻璃窗同門之類嘅嘢,爛咗些少時都只係求其搵啲牛皮膠紙貼住算數,因為我相信被人再打爛嘅機會都好高,因為嗰一刻我都好想一腳伸過去,如果唔係有人行埋嚟.擺個車廂係度又唔開,壞咗又唔換,通告又只得意大利文,買咗飛啲人點算,真係唔知佢想點.

不過當車程去到一半行去廁所時,嗰車廂竟然開咗,我諗應該係之前人少所以唔開,咁樣個查票員就可以快啲查完休息,買咗飛都話之你.

當火車慢慢駛入Genova Brignole站時,謹慎起見,都係問吓人,証實下個就係Genova Piazza Principe站都安心啲.

係月台要落隧道先可以行出大堂,但只得樓梯冇斜路更無扶手電梯同升降機,唔通佢以為啲遊客唔會坐火車,定係要我好似做戲咁,推啲行李落去算數.

呢個就係火車站啦,外表古色古香,設施都一樣,火車站前嘅哥倫布像, 對正火車站前嘅Via Balbi街上,有好幾間平價旅館,我就住呢間,呢間真係自己獨立一座,啲房都好乾淨整潔,照舊雙人房連獨立沿廁,由60講到唔要早餐兼即俾現金55一晚,而呢條街亦係通往舊同新城嘅主要通道,又可慳車錢.

安頓完後,向火車站方向行番上去,因為頭先見到呢度門唔知乜嚟,看圖識字應該係升降機,行入去八吓,成部售票機係度,要買飛嘅咩,好似夠鐘開喎,入咗至算,升降機會經過一條好長嘅單程路至升上去,都幾好玩,上到頂就係Castello d' Albertis城堡,現在係博物館同餐廳,經過呢個入口就到啦,係城堡前個公園度可以盡覽整個海港.

參觀完之後,原本都諗住行番落去慳番啲車錢,但係咁鬼高,唯有博多次大霧.離去時剛好有兩名職員企係辦公室門口吹水,哈哈,我哋就繼續掂行掂過扮無嘢,當然如果你俾人捉到無飛要罰錢唔好怪我.

而我將遊覽熱那亞,分成三部份,就係舊城區,新城區同海港區.

點都好,趁佢未沉,好快啲去.

買火車票時要留意,要揀Venezia S. Lucia先係入到去本島,Ve. Mestre呢個係佢前一個站.提提大家,離開Ve. Mestre呢個站開始駛入本島時,記得留意兩旁嘅海岸景色.

主要交通公具就係水上巴士,不過我提議大家,由STAZIONE SANTA LUCIA火車站,沿橫街窄巷,兼漫無目的咁行去PIAZZA SAN MARCO聖馬可廣場,仲寫意,好過坐係架水上巴士度咁焗促.

入得本島嘅都係遊客居多,想搵平價旅館真係幾難,出咗火車站轉左行無耐見有間3星酒店就去問吓,講極雙人房連獨立浴廁包埋自助早餐(冇得唔要)都要80歐羅一晚唔肯再減,其實酒店旁邊條橫街,望入去仲有幾間喺好入吓,不過朋友話好似好靜唔好行入去,怕玩得夜返嚟行入去危險,依家呢間話哂對正大街,人來人往冇有怕,雖然唔平都算啦,就豪一次,唯有食早餐時儘量食多啲幫補吓,網頁http://www.hoteluniversoenord.com/eng/index.html.

仲有就係搵唔到超級市場,大家嚟之前有乜要買好似水咁就要買定,好在我都估到買咗兩大支擺喺喼度,早餐食得好飽可以唔食午餐,哈哈,我們就有樣好處,顧住行街睇嘢window shopping影相同遊覽,可以嘢都唔食都唔覺肚餓,等到晚餐,就係酒店對面間餐廳度食(又要豪一次).

大家都知威尼斯最出名嘅,就係MURANO島嘅玻璃製品,唔使去到MURANO島,周圍嘅商店都有好多唔同嘅精品,好似呢個,間屋唔夠大荷包唔夠脹,都唔使諗,好似我咁,唯有影張相留念.而我就係咁,一路行一路睇兼夾留哂口水,行到去嘆息橋PONTE DEI SOSPIRI都唔知,呢,左面最後嗰條呀,睇唔清楚唔緊要,呢張近啲.

每年大約一月尾二月頭,都會有個一年一度嘅盛事,就係面譜節,到時街上啲人,都會扮鬼扮馬,我去到時雖然已經結束,不過當地人依然樂此不疲,繼續.

聖馬可廣場上唔只人多,白鴿仲多

廣場上的天文鐘

聖馬可大教堂BASILICA DE SAN MARCO

唔怕暈船浪,可以坐吓貢多拉GONDOLA

亦都可能係遊客多嘅關係,某啲商店,星期日都開門做生意,唔使驚無得shopping.

最攪笑仲係,係旅遊點度,你會見到好多黑人,攞住個大包袱行嚟行去,佢哋其實係小販,一見警車駛埋嚟,就會即刻執包袱走.

另外就係老生常談嘅 : 街頭騙案,哈哈,警訊度就睇得多,今次親眼見到,仲要嚟到翡冷翠咁遠.話說有日喺露天市場行行吓,見度幾個人男男女女堆埋一齊,以為有平靚正嘅好嘢執,即刻埋去八吓,原來有個鬼佬喺地下擺咗3個杯,跟住放個盒仔入去其中一隻杯入面,之後就慢動作係咁轉,真係無可能睇唔倒邊隻係,之後梗係有個鬼妹俾咗50歐羅兼估中,鬼佬即時俾錢冇手軟,真係假得佢,總之一句講哂,光棍佬教仔,便宜莫貪.

我有冇玩埋一份,哈哈,我咁精靈,我唯一想嘅係,扮死屍瞓喺地做街頭表演賺番啲旅費,不過朋友話我痴線冇啋我.

今次已經係第四次來訪,每次都諗住去烏菲茲美術館度參觀,唔係無開,就係排哂長龍,次次都緣慳一面,唯有再等下次啦.

另外要提醒大家,千萬唔好著高跟鞋,因為佢啲路係石頭路,凹凸不平.

今次最大收穫,當然係搵到間平靚正嘅中式快餐啦,可惜我啲國語簡直笑死人,好在位姐姐都知我講乜,係度提提大家,唔好以為講歪小小就係國語.

由翡冷翠前來,應該由邊處來都好,一定要坐巴士,單程6.5歐羅,因為火車站離市中心好遙遠,而巴士總站就係正市中心.巴士有快慢之分,記得睇清楚先好上車,市內有好幾個分站,記得唔好落錯.(至於點搭巴士同巴士公司網頁資料,請觀看THE MALL嗰篇網誌.)

亦可stay係呢處,去附近山城遊覽,網頁http://www.sienamobilita.it/EN/index.html有哂巴士資料.

我就係坐呢架雙層巴士嚟嘅,巴士站隔離有個露天市集,逢星期三上午至下午1點收,日常用品,衫褲鞋襪,蔬果等等乜都有.落車後第一時間搵回程嘅巴士站,一個個牌寫住去羅馬同去比薩,行云成個站,唯獨無去翡冷翠嘅,心諗唔會有車嚟就冇車走啩,問啲司機嗰站喺邊,佢就指住我坐嗰架巴士,有車冇站,真係吹佢唔脹.

從巴士站後方行入去,行大約2-3分鐘去到一個廣場,廣場右上方有間麥記,麥記隔離係一個小型購物中心,地低嗰層有間大超級市場.唔去麥記就沿路一直向前行入去,雖然一條條橫街窄巷縱橫交錯,猶如迷宮,因有指示牌話你知點行去每個旅遊點,所以唔使睇地圖都唔會迷路.

向前行無耐,就會到達PIAZZA SALIMBENI廣場,可沿路行去BASILICA DI S.FRANCESCO教堂.

參觀完後行番出去,繼續穿梭於橫街窄巷中,之後就會見到被全世界公認為最美的PIAZZA DEL CAMPO廣場,沿斜路行落去就得啦,每年夏季,廣場上都會舉行Palio賽馬節,網頁http://www.paliodisiena.biz/,不過只得意大利文;四周佈滿餐廳同紀念品店,廣場上的水池,廣場前方的PALAZZO PUBBLICO,可入內參觀MUSEO CIVICO市立美術館,或登上Torre del Mangia高塔,旁邊有間PIZZA快餐店,唔食嘢都可以順便去個洗手間.

由於城市係依山而建,所以好多呢啲又長又斜嘅巷弄.

差不多每個意大利城市,都總會有一座DUOMO大教堂,網頁http://www.operaduomo.siena.it/english/index.html

.

嘩,幾高,從這兒可遙望BASILICA DI S.DOMENICO教堂.

有興趣,可以去佢網頁睇吓http://www.terresiena.it/或http://www.comune.siena.it/ilturista/?lan=ENG