文章分類: 歐洲自由行-比利時 (我要活出精彩的人生)

比利時自助遊-注意事項

lolo2007 — Thu, 26 Jun 2008 00:00:41 +0800

如果冇買火車証,可直接上國鐵網頁買火車票,國外線有特價,當然又係數量有限,行程已定就要早啲買啦,唔係買哂就冇.

國內線雖然無特價,但票價都唔算太貴,除非想一日內去2-3個城市,如果唔係散買會抵過用pass,去到當地至買都得,想check時間表可以去網頁睇,想check國內線火車價錢,去到網頁,按最底下Buy your ticket轉入下個畫面,tick"ORDINARY TICKET"再按底下Next Stage轉入下個畫面,輸入出入城市名就得.

想買國外線火車票,去到網頁,依照指示輸入所有資料就得,取票方法都係自己print,緊記帶埋佢份confirmation同買票時用嘅信用卡出發.

唔同國家嘅國鐵,都會有特價國外線火車票供網上購買,出同入都得,取票方法都係自己print或郵寄,除咗意大利(入去嘅火車票取票方法得兩種,郵寄-但只限國內,或去火車站取-又係只限國內火車站,即是出境可上網買,入就唔得,因為攞唔到)唔怕煩,可去埋網誌內 : 法國自助遊-注意事項 , 德國自助遊-注意事項 , 荷蘭自助遊-注意事項 , 意大利自助遊-注意事項二 , 睇吓邊個平啲,再決定幫邊個買,網誌內有教大家點做同佢哋嘅國鐵網址.

坐eurostar去倫敦,可以去埋eurostar的網頁睇吓邊個平些.

想知多些旅遊資料,可以去網頁睇.

名不見經傳-Antwerp安特衛普

lolo2007 — Thu, 10 Jan 2008 09:00:16 +0800

比利時,一向都唔係去歐遊時的必然之選,就算去,頂多都係去吓首都布魯塞爾,就當已經去過;所以雖然佢係第二大城市,但個名真係聽都未聽過,更加唔會諗要到此一遊,就連旅遊書都未介紹過.

直至有6條友,係時裝展上大放異彩,人們才四處去找,究竟安特衛普係邊處;而佢亦"忽然時裝",一夜間,變成另一個時裝之都,差啲蓋過鑽石之都呢個美譽.

對女士嚟講,佢簡直就係天堂;而男士應該視佢為地獄,除非你大把錢唔志在,兼大把時間同腳力,陪住慢慢行逐間睇.所以嚟歐洲,同志同道合嘅人去,好過同身邊嘅另一半去,唔係你一路行一路睇一路買,佢就一路哦,煩都煩死.

佢都有為遊客而設嘅觀光証,又係免費搭公共交通工具和進入博物館等等嘅旅遊點,不過如果唔打算睇哂佢的話,就無須買啦,因為由火車站往觀光點唔係好遠,可以唔使搭車.

從中央火車站出嚟,沿De Keyserlei街向前直行,至Appelmansstraat街轉入去再直行,便可到達Provinciaal Diamant Museum鑽石博物館.如果對此無興趣嘅,就無謂轉入去,繼續行至 Leysstraat街,再往前至Meir街,呢條係著名購物街,只要沿路行,一邊shopping,一邊往前走,就唔會覺得疲累.一直行,便可來到The Groenplaats廣場,後面好高嗰嘅就係Our Lady Vrouwe Kathedraal教堂,廣場內佈滿餐廳同露天茶座,行咗咁耐應該坐低休息吓.

休息完再向前走,便到達Grote markt廣場,人們稱它為此城最美的廣場,或者你都可以比較吓邊個靚啲,相中個座係the Town Hall市政廳;相入面個雕塑,係一個人揸住隻斷掌準備掉出去,點解,一陣再講.廣場上當然亦有好多餐廳同露天茶座.

離開廣場向River Scheldt河方向行,便可來到一座由石頭造成嘅城堡,The Steen Castle,現為Nationaal Scheepvaart Museum博物館.城堡前嘅雕塑,係描述係好耐之前,有個巨人企係河邊,阻頭阻勢唔俾人過河,之後梗係有個勇士挺身而出,為民請命對付佢,仲將佢隻手掌割咗出嚟掉,即係頭先個雕塑;所以你會明白點解街上會有啲一隻隻手掌形嘅朱古力售買.有時間又有興趣,仲可以去坐吓觀光船遊覽.

除咗以上所講嘅旅遊點外,其實仲有動物園,Fashion Museum等等,所有資料,可以去佢嘅旅遊網頁查詢.

而其餘一般事項,當然可以係我嘅"歐洲自助遊心得"目錄內查詢.

Brussels布魯塞爾

lolo2007 — Sun, 06 Jan 2008 21:43:04 +0800

講起比利時,你可能只會諗到朱古力同窩夫,無諗過會來此遊覽.

佢就好似電視台啲三線演員,冇乜緋聞,唔會記得佢叫乜名,永遠企喺主角後面,冇人會留意佢做得好唔好.就連歐洲最出名嘅足球,都永遠唔覺佢可以打入16強,既冇靚仔球員,又冇名牌可睇,朱古力同窩夫食得多又會肥喎,但係去到又冇理由唔食,點算好.

可能因為咁嘅關係,所以當我第一次,由阿姆斯特丹坐火車去布魯塞爾時,當火車慢慢埋站,睇見個月台同周圍環境,真係殘舊到你唔信,即時被佢嚇窒,堂堂首都嘅主要火車站都咁樣,市容都唔慌好得去邊,由於當時我用嘅係歐洲火車証,去邊都得,而架火車嘅終點站係巴黎,於是乎我同朋友都決定唔落車,早啲落巴黎好過.

之後再計劃另一次行程時,發覺都唔應該咁就判佢死刑,或者佢係敗絮其外,金玉其中呢,就俾次機會佢上訴啦.

佢亦有為遊客而設嘅Brussels Card,又係一咭在手,可任坐各種公共交通和免費或享折扣優惠於各個博物館等等,值唔值得就見仁見智,如果對佢啲博物館無乜興趣,好似我咁,買張一日交通証會化算啲.

遊人必到的Grand Place大廣場上,佈滿十七世紀時的哥德式建築物,

,廣場旁邊的Rue des Barchers街,是出名的海鮮街,一間間餐廳門口,均以海鮮作裝飾,吸引人們幫襯,提議大家試吓佢啲青口,新鮮味美.

Manneken Pis撒尿小童像,耐不耐就會換第二套衫,不過今次呢件咁似囚犯衫嘅.

Palais Royal皇宮.

St Michel and Gudule聖米歇爾教堂.

有興趣可以去佢嘅網頁查詢資料.

而其他一般資訊,就可以係我嘅"歐洲自助遊-我得你都得"內參考.