由Interlaken坐火車去Geneve呢程Golden Pass,沿途會上山同落山,風景都絕不遜色,望住山上一間間小屋,真係好想自己都有一間,我當然買唔起,唯有買個小屋音樂盒當係.

嚟到當然要遊Lac Léman日內瓦湖,持是但一款Eurail Pass或Swiss Pass都可免費坐,船公司網頁有詳細資料.

市內觀光,基本上又係唔使坐車,行路就得.出咗火車站,沿Rue des Alpes行去湖邊,離遠已經望到巨型噴泉,過埋Pont du Mont-Blanc橋,就會見到另一樣巨型花鐘.

影完相可以沿湖邊散步,或者行入舊城遊覽.

想知多啲當地資料,可以去佢網頁睇吓.

日內瓦湖另一面有座古城堡Chateau de Chillon西庸城,位於湖畔,可以即日來回去參觀,由日內瓦坐火車去到Montreux再轉巴士,詳情可以去網頁睇.

顧名思義,她就是位於Brienzersee湖同Thunersee湖中間嘅小鎮,小鎮真係好細,基本上得一條大街,由火車東站行去西站,3,4個鐘都行完,不過行吓,坐吓,hea吓,睇吓風景,咁就一日.

第一次來,因為要上少女峰,旅遊書無介紹鎮上有乜好睇,只係介紹去遊旁邊兩個湖同游船河時中途有個鐘乳石洞,即是無景點可言啦,當年(哈哈,睇番啲相至知,原來已是91年)又未有上網搵資料呢樣嘢,所以只住咗兩日,嚟到至發覺,真係無招勝有招.所以決定,下次一定要再嚟.

呢隻就係遊Brienzersee湖嘅船啦, 沿途景色係咪好靚呢,其實坐火車去Bern條鐵路,係沿湖邊行,如果怕暈船浪,可以坐火車,不過當然冇坐船咁寫意,可以選擇坐船來回,或者去到Brienz落船坐火車回程,亦是持是但一款Eurail Pass或Swiss Pass都可免費坐.

Thunersee湖就冇坐船游湖,因為第一次去時,有船但要俾錢(因為有季節性,免費嗰間未開),第二次再去又係未開,好在我住嗰間hostel係正湖邊,睇小小好過冇.

想知多些游呢兩個湖的資料,可以去網頁睇.

想知多些Interlaken的資料,可以去佢官方網頁睇.

一出火車站,就會望見呢個Chapel Bridge水塔花橋,我好慶幸在它未受祝融之災時到過,行過條橋,留低幾條頭髮,同影低幾張相俾大家睇,雖然當時佢都係維修緊,穿過條橋,再向前行,就可去到對岸嘅舊城區,是購物區,全是紀念品店,餐廳同百貨公司,後面有個古城牆,可以行上去,望吓周圍景色.亦可沿湖邊散步,睇吓啲天鵝同鴛鴦喺度戲水.

呢個係市內另一個象徵,垂死獅子像

另一個令我鍾意佢嘅原因,就係可以坐喺遊湖船內,欣賞周圍景色,唔使自己行到腳軟.一出火車站就會見到上船嘅碼頭,記得攞番張時間表睇吓,船上有餐廳,貴唔貴就見仁見智,不過嗰一刻心情好唔會覺貴,所以我都幫襯佢食咗個雪糕,他他條條咁邊食邊觀賞景色,真係好嘆,持是但一款Eurail Pass或Swiss Pass都可免費坐,網頁有詳細資料.

其他詳細資料,可以去佢官方網頁睇吓,有中文.

記得帶太陽眼鏡同手套,唔係會有雪盲同玩到隻手疆硬.

上山一定要天氣好至得,不過天氣差佢都唔會俾你上去.我就好好彩,去2次都無問題上到去.

冬季上山,如果企係太陽底下仲唔會太凍,不過最好都係著長袖衫同帶多件外套好啲,因為企喺個火車站等車時都好凍吓,如果真係怕凍頂唔順,可以留係室內唔出去.

山上有餐廳,唔使驚無嘢食,但價錢當然唔平,所以最好帶定麵包同水.不過貴唔貴就見仁見智,而我嗰一刻心情好,望吓餐牌價錢都接受到,所以就幫襯佢食午餐.

上山同落山條路唔同,不過風景一樣咁靚,特別落山時由高處慢慢行落去嗰下,所以咪瞓著要睇實(俾咗咁多車錢),亦由於架火車係慢慢行落山,所以隻耳仔受嘅壓俾坐飛機多(我覺得),我第一次落山時隻耳仔冇乜點受壓,但落到山隻左耳就好似塞咗咁,第二日至通番;幾年後再去隻耳仔就好似俾針吉咁,不過就冇塞到.所以要有心理準備.

上少女峰除咗住宿喺Interlaken,亦可考慮住喺Lauterbrunnen,網頁有旅舍資料,其中有間Valley Hostel周圍環境唔錯,可去http://www.valleyhostel.ch/index.php?lan=e&pag=0睇吓.

如果玩嘅日子耐,應該考慮買Swiss Pass,連續用4-22日不等,或Swiss Flexi Pass一個月內用3-6日不等,兩隻Pass都有頭等或2等揀,2人同行仲有折扣優惠,26歲以下可買青年証.而功用除咗同是但一款Eurail Pass一樣外,仲可以免費乘坐市內公共交通公具,免費進入某些博物館,Swiss Flexi Pass當然要個日有寫落Pass度先可免費,但係喺有效期個一個月內,無用証嘅其他日子,買火車票,遊船等等可享高達50%折扣優惠,有興趣可以去佢網頁睇吓,想買就去學聯,歐陸或其他旅行社問吓邊間平,攞証時記得對清楚個名無錯至好走.

順便一提,任何一種Swiss Pass,都可以係火車上要求查票員代辦生效手續,我已經出過email問.

**剛剛係討論區度見到有人話遊瑞士如打算上少女峄買half-fare card會抵啲,因所有火車票都有半價包括上少女峄,不過就要去到瑞士先有得買,詳情可以去呢個網頁睇.

持是但一款Eurail Pass同Swiss Pass,可免費乘坐游湖船,要注意的是,如果你張pass係一或兩個月內用幾多日果種,要坐就要填上當日日子落張pass度先坐得,唔填等如無pass,即是唔坐得.如果打算坐又唔想浪費一日証,可以晨早由第2處坐火車到埗,安頓後就去坐船,咁早hostel係未有得check in,但佢會有locker(無鎖)或地方俾你放低行李.通常會有幾間公司經營游湖船,所以上船前最好俾張pass佢睇係咪免費,因為佢同火車一樣,任你上,開出後至逐一來查,到時至發覺就只好俾錢.上船前亦要攞定張時間表睇吓,表內會清楚列出停站地方,幾點到同開,沿途可以隨便上落,如果停站地方有火車站,可考慮坐火車返轉頭都得.

依家上網買火車票有特價,但就數量有限,要買就越早越好,同埋唔可以更改同退款.佢有幾種唔同俾你揀,去到網頁,頁低有個New in the SBB Ticket Shop,按入去轉入下一個畫面,就可以買2個月內去德國,法國,意大利同奧地利嘅火車票,取票方法可揀自己print,去到當地火車站counter度攞或郵寄,如選擇自己print,就緊記帶埋佢份confirmation同買票時用嘅信用卡出發.

去番網頁,左手邊Travel in Europe下面,按Click&Rail Europe轉入下一個畫面,就會見到 :-

• Click&Rail Switzerland,唔使講都知係國內線,比正價平至少平60%,不過只預售3日,買哂就冇

• Click&Rail Europe(Germany/Austria/Italy),比New in the SBB Ticket Shop嘅特價票平些少,不過無法國同埋只預售7日.

其實城市間坐火車來回都好快,可考慮買Swiss Pass,搵一個地方做據點,再1日來回去其他城市,好處係唔使搬來搬去,例如stay Luzern或Interlaken去Bern同Zurich,想查時間表可以去網頁睇.如果打算每個城市都stay,就似乎散買抵啲.假如你是由意大利坐火車去Zurich或Luzern等地,而又有買火車証,提議可買火車票去到Lugano,落火車後即到train office度valid張pass來用,咁會抵過買火車票由意大利直去.

唔同國家嘅國鐵,都會有特價國外線火車票供網上購買,出同入都得,取票方法都係自己print或郵寄,除咗意大利(入去嘅火車票取票方法得兩種,郵寄-但只限國內,或去火車站取-又係只限國內火車站,即是出境可上網買,入就唔得,因為攞唔到)唔怕煩,可去埋網誌內 : 法國自助遊-注意事項 , 德國自助遊-注意事項  , 荷蘭自助遊-注意事項 , 意大利自助遊-注意事項二 , 比利時自助遊-注意事項睇吓邊個平啲,再決定幫邊個買,網誌內有教大家點做同佢哋嘅國鐵網址.

瑞士消費貴,住宿都貴,呢個網頁,有哂全瑞士嘅青年旅舍資料,有興趣可去睇吓同做booking,記得喺香港申請咗張青年旅舍証先好出發,話就話青年,申請同住宿都冇年齡限制.我就住過Zurich,Luzern,Interlaken同Geneve嘅青年旅舍,最正就係Geneve呢間,因我住個間係頂樓嘅雙人房連浴廁,價錢當然比住床位貴好多,但頂樓周圍係露台,可以喺房行出去兜個圈睇哂四周景色,當然包括日內瓦湖同噴泉啦.Interlaken個間都唔錯,對住Thunersee湖.

想住酒店嘅,可以去呢個叫Easy Hotel網頁睇吓,佢標榜自己的酒店平靚正,係Basel同Zurich,英國London同Luton,匈牙利Budapest都有分店,冇嘅都可以幫你search,有興趣可以去網頁睇吓.

仲有就係佢唔係歐盟成員國,所以離開時記得搵海關蓋印,無蓋印等如無做退稅,就算俾錢時已扣除稅款,佢都會經信用卡問你攞番.而每份退稅表都會有一份退稅指引俾大家參考,所以記得睇清楚.

如坐飛機出境,是在過關後於禁區內的自動櫃檯中辦理(當然最好都係睇清楚退稅指引的指示來做,因可能會有更改),只須依照指示做便可以,無論所購買的是貴重物品定唔貴重,海關都有可能會出來要求查看所購物品,故謹記不要寄倉,咁樣當然好煩,要帶哂啲戰利品上機,所以喺度買手表好啦(如果有錢).如坐火車離境或入境時就要加倍留意,最好問定查票員幾時到邊境,海關幾時上車,差不多去到邊境時一見海關人員就即刻叫佢蓋印,再檢查吓個印是否清楚.

N年前我就試過同朋友,因為大減價買咗唔少嘢(包括LV,GUCCI,水晶,衫褲鞋都有),由Innsbruck坐火車去Zurich,玩完再返香港.到咗邊境火車停咗喺度,我就坐喺度大安旨意等海關人員嚟查passport,因為有時海關會上定火車坐,去到邊境時就開始查,有時就會停喺邊境度,然後海關先上火車查,點知今次停咗一陣架火車就開番,唔見有人查,一見查票員經過梗係捉住問海關幾時嚟,佢竟然同我講如果佢哋認為架火車啲乘客係ok無問題,就唔會上嚟遂個睇,唔係啩咁俾面(雖然我哋真係良好市民),唯有等去到Zurich嘅旅客服務中心再問,佢哋當然同我講"小姐,你應該係火車度叫奧地利啲海關人員同你蓋印,你唔記得冇做我都無辦法."我就話"唔係我唔記得冇做,係佢根本無上嚟",佢就好似好無奈咁講"唔好意思,我都無辦法".點好呢,我哋兩個啲退稅夾埋都有3千幾蚊,唯一辦法就係案件重演,即係入多次境,好在個火車証仲有1日可以用,哈哈,原因係我每次上火車都唔會寫定日子落去,等查票員打開見到先寫上去,有啲以為我個証係全月通,望都唔望就走咗,所以就有剩,於是乎就揀咗個最近嘅德國城市Freiburg去,第二朝晨早起身帶哂所有要退稅嘅嘢上路,去到即刻坐返火車番嚟,一上火車已經見到成班海關人員坐咗喺第一個廂房,我哋梗係坐喺隔離個廂房睇實,一見佢哋成班出嚟即刻開門俾佢入嚟,再隊哂啲退稅表(都好多張)俾佢蓋印,可能佢哋都未見過啲咁壯觀嘅場面,笑笑口睇都無睇啲退稅品就蓋印俾番我,唉,終於任務完成.點知返到Hostel先發覺有張個印唔清楚,都無計,最後呢張梗係攞唔番錢,好在都係百幾蚊.

雖然我唔知依家會唔會仲係咁,不過講出嚟等大家有個準備.

Mendrisio有個factory outlet叫Fox Town,開星期一至星期日,網頁有哂資料.

其他要注意的一般事項,可到網誌內'歐洲自助遊-我得你都得'中參考.