希斯路機場網頁,有哂進出資料.

坐廉航時,多數要去另一個機場 :

• GATWICK網頁
• STANSTED網頁
• LUTON網頁

是但一款Eurail Pass,英國係唔通用,要用英國自己出的火車証,當然如果只去倫敦就唔使買呢個火車証,想知多些旅遊資料同火車証資料,可以到它的旅遊官方網頁睇.

想坐eurostar去巴黎或布魯塞爾,可直接到它的網頁買,有特價,唔怕煩可以去埋網誌內:法國自助遊同比利時自助遊度睇吓,幫邊個國鐵買平啲.

距離倫敦1個鐘車程有個BICESTER VILLAGE嘅OUTLET,有興趣可以去網頁睇吓.

由London去Manchester,可考慮坐Vigrin Train的火車,網上買有特價,是由London Euston去到Manchester Piccadilly,詳情可到網頁睇吓,買完佢會send個message俾你,呢個就係e-ticket,幾方便,不過我未買過,只是係討論區見到,所以post俾大家參考.

以前就算特價機票,都可以咁做,我都試過幾次,由尾站玩完飛返巴黎,出去玩完shopping完再走.

但剛剛幫網友查過,亦打完電話去問,原來依家特價機票無得咁樣飛.

例如依家特價機票港幣5,000(唔計機場稅同燃油附加費),就要由香港經巴黎轉機去威尼斯,玩完由尾站羅馬經巴黎轉機返香港,冇得再好似以前咁,停巴黎玩幾日至走.

不過想停喺巴黎玩幾日至走都得嘅,但就要選擇港幣6,570(唔計機場稅同燃油附加費)嘅機票,咁就可以頭站飛到去巴黎,出去玩完,幾日後再返入機場轉內陸機去第二個城市,又或者尾站先飛返巴黎,出去玩完,幾日後再返入機場坐機返香港.

大家亦可選擇照買特價機票港幣5,000(唔計機場稅同燃油附加費),由香港經巴黎轉機去羅馬,一路玩上去,之後坐火車或買廉價航空公司嘅內陸機票返巴黎,玩完再由巴黎坐飛機返香港.

點樣買火車票,可以去我編〔歐洲自助遊注意事項三:點樣搭火車同買火車票〕度睇吓.

而廉價航空公司嘅資料,就可以去以下幾間參考吓: 

• http://www.easyjet.com/en/book/index.asp
• http://www.ryanair.com/site/EN/
• http://www1.skyeurope.com/en/
• http://www.vueling.com/
• http://www.lot.com/default.aspx?_lang=en

• http://www.jetair.pl/frontpage.jsp?menuId=10,不過只得波蘭國內線

有啲機票真係好平,不過要留意嘅係,限制會有好多,好似行李重量同數量一過就要另外再俾錢. 

再唔係,亦可以選擇坐直航去倫敦,由於香港去倫敦航線競爭特別多 ,坐國泰特價3,180(唔計機場稅同燃油附加費),真係抵到嘔,之後再自己上網買廉價航空公司嘅內陸機票去目的地,不過要注意嘅係,香港飛倫敦,係去希斯路機場,而廉價航空公司嘅飛機,就多數喺吉域機場起飛,換言之去到要自行坐車去吉域機場,有好有唔好,大家要自己衡量.

除咗以前所講外,仲可以考慮阿聯酋http://www.emirates.com/hk/English/index.aspx,同卡塔爾航空http://www.qatarairways.com/global/en/homepage.html.

今次去意大利,羅馬入都靈走,因為來回程地點唔同,所以要打去法國航空度直接出電子機票,網上做唔到,而直接同航空公司訂就唔使驚執笠冇得賠.

上年11月尾打去訂位時,個接線員話有位兼初步確認埋,只要係一星期內再打電話去俾齊信用卡資料過數就得啦,我見反正都決定去,當然話即時俾埋佢,費事又要再打過嚟咁煩,佢話無問題叫我等等,等咗一陣就話電腦系統好繁忙,提議我不如遲啲再打嚟,我話唔緊要,再等吓先囉,等咗好耐都未得,無辦法,唯有收線遲啲再打.

當時我諗不如等到星期六,一早9點幾打去,應該無咁繁忙啩.

當日一早起身打去,俾齊信用卡資料,佢覆完後話我知機票價錢,一聽點解多咗兩百幾,個接線員就解釋話,因為12月1日開始加燃油附加費,而當日正是12月1日,我即刻話當日係你個電腦系統繁忙攪到我做唔到呢個程序,有乜理由依家要我俾多兩百幾,佢話佢都冇辦法,我就唯有硬食照俾,除非唔去.

所以係度提提大家,錢遲早要俾就無謂拖,特別依家啲石油,日日係咁不斷升,你點知佢幾時又話要加燃油附加費.

今次坐完飛機至發覺,原來有部份旅客,是不清楚機場嘅新措施.

咁又係,如果唔係成日出境嘅話,根本唔會留意.

好似我哋香港個機場,無論係出境大堂,定航空公司櫃台,都無明確寫明,有乜嘢係唔可以手提上機,要到你過咗出境櫃台,去到X光機前,至有張通告寫明乜嘢係唔可以手提上機,但亦為時已晚,唯一辦法就係唔要,好似液體用品,如飲用水,一定要裝係一個100毫升嘅容器內,我係機場就見到唔少旅客,揸住支水即時飲哂或唔要.

詳細情形,大家可以去國泰嗰網址http://www.cathaypacific.com/cpa/zh_HK/homepage睇吓.

搭飛機,除咗要有passport同飛機票之外,仲有啲細微嘅嘢,值得大家留意.

例如衣著方便,越簡單就越好,如果唔係,到過X光機時,你就知錯,以下幾樣,梗係可免則免,如果唔係,最好除定出嚟,等到你過X光機時,將此等物品,放入機前的膠盤內過機,唔係,等到你時,至裙拉褲甩咁除出嚟,盞俾人望同話你阻住 :

• 皮帶
• 帽同頭巾
• 厚踭皮鞋或長靴 

• 頸巾同手套

除此之外,冬季坐飛機,外套就算著住,都要除出嚟獨立過機,唔好諗住入咗機場,上咗飛機,無出面咁寒冷,就可以唔著寄倉算數,因為飛歐洲嘅航班,多數係夜機,天未光就到,若果咁唔好彩,班機泊喺外面,要坐巴士去客運大樓嘅話,真係凍到騰騰震,所以外套一定要帶埋上機,可以帶定個膠袋或紙袋裝住,連個袋一齊過機,就唔會煩.

坐長途機,以下幾樣嘢,亦係必備:

• 拖鞋 - 係飛機坐十幾個鐘,當然要除咗對鞋,唔好焗住對腳,有拖鞋,行出行入都方便啲.
• 潤唇膏同潤膚膏 - 因為係飛機度,都好乾燥.
• 牙刷同牙膏

而揀位坐時,最好唔好揀機尾或每一排最後嗰行喺坐,原因除咗近廁所外,最重要係空姐會擺啲小食同飲品係到,俾啲乘客隨便飲用,有啲人,真係唔啾米氣,自己瞓唔著,又唔會喺自己個位度坐吓,睇吓電視,反而會三五成群,企係處食吓嘢同傾吓計,特別係啲外國人,三唔識七都可以傾一餐,雖然聲浪唔算大,但係正你隔離,好似隻蚊咁'溫溫'聲,咪話唔煩.

坐飛機時,亦唔使驚會餓親,因為除咗有飛機餐食之外,定時定候,會有唔同嘅小食擺喺度任取,好似三文治,杯麵同雪糕等.

**大家都知寄倉行李有重量限制,一過重就要俾錢,如果你是同朋友一齊去旅行的話,就記得同職員講所有行李一齊計重量,咁就可以免除行李過重要俾錢啦,除非所有人都overload得好犀利.**

以上,都係我自己坐飛機時嘅一啲心得,希望大家用得著.

雖然之前都有提過大家,要帶啲乜嘢去,依家一次過列哂出嚟,方便參考:

• 背包或斜揹袋仔 - 用嚟裝日常出街用嘅銀包(只有少量現金),旅遊書,水等等嘅立雜嘢.
• 貼身腰包(薄身) - 用嚟擺哂其餘嘅現金,旅行支票,護照,保險單等等重要文件,將佢'cool'係腰再搵條褲圍住貼身收藏,就冇理由俾扒手偷到,除非攞刀指住唔俾唔得啦.不過如果你係大汗而個腰包又唔防水的話,就最好搵個膠袋隔住,唔係濕咗就會爛.款式好似呢個咁
• 旅行用電熱水煲或爐 - 平價酒店同旅館,都唔會有熱水壺裝定熱水俾你;有啲國家,自來水可以直接飲用,不過為免水土不服,都係煲熱佢至好飲,或者買礦泉水都得,有熱水仲可以沖杯麵食.
• 即沖涼茶 - 歐洲嘅食物,大多數都係煎同炸,或者燒烤,有佢就唔怕熱氣啦.
• 鎖頭同鎖鏈 - 萬一坐通宵行駛嘅火車,而又book唔倒廂房,就可以用嚟鎖住啲行李或者其他嘢.
• 風筒 - 平價酒店同旅館都係冇得供應,冇帶嘅話,洗完頭,啲頭髮有排都唔乾.
• 有色唇膏 - 就算平日唔化妝,都應該買支去旅行用,因為搽咗之後,影相都會靚啲.
• 萬用刀同食具 - 以前可以係航機上面攞,但依家袋住落機,俾人搜到就一身蟻,有排解釋.所以最好放入行李寄倉,杯就可以係飛機度攞. 
• 所有充電器 - 當然係指將會帶去用嘅數碼相機同流動電話所屬嘅充電器.
• 方腳轉圓腳電插頭 - 歐洲嘅插頭,多數都係咁樣 o          o,所以要買定去,唔係冇得充電.當然可以去到買,不過好貴.電池都一樣,要預多些少.英國就係3腳方插頭,同以前香港一樣.或者去呢個網址睇睇,有哂全世界嘅電壓資料.
• 藥物同膠布 - 帶定啲胃藥,退燒藥等等嘅成藥,以備不需.
• 太陽眼鏡 - 太陽猛烈時,有佢就唔怕睜唔開對眼;如果打算上雪山,就更加要有,唔係會有雪盲.
• 防曬膏 - 旅行時,戶外時間比平日多,所以一定要有.
• 護膚面膜 - 如同上面所講,太陽曬同風吹到塊面異常乾涸,帶埋佢就萬無一失.
• 帽 - 夏天帶太陽帽,唔怕曬乾頭頂;冬天就最好帶冷帽,唔怕吹到個頭刺痛.
• 繩索 - 如果打算自己洗衫慳番啲錢,有佢就可以用嚟晾乾啲衫.
• 女士就最好帶定衛生巾(如果有需要),雖然當地都有得買,但牌子唔同,亦唔似香港有咁多種款式俾你揀,更加可能會用唔慣.
• 潤膚霜同潤唇膏 - 冬天就一定要,不過其他季節,帶定都無防.
• 眼鏡 - 無論係近視定老花,都要帶多一或兩副,萬一爛咗點算.
• 針線包 - 萬一個貼身腰包或其他嘢爛咗或爆線,都有得補番.
• 牙籤 - 餐廳多數冇得供應,要用最好自己帶定.
• 拖鞋 - 平價酒店同旅館都冇,況且可以帶埋上飛機著,行來行去都方便啲.
• 小量証件相 - 有啲城市嘅旅遊証或交通証,會要求貼一張近照係個証度.
• 紙同筆 - 可以用嚟記低啲嘢.
• 小型計算機 - 係超級市場買完嘢,或餐廳食完嘢,用嚟計吓要夾幾多錢,或者當睇見一樣心水貨品時,可即刻計吓抵唔抵買.
• 鬧鐘 - 萬一要晨咁早搭車走,有佢就唔怕唔知醒.

以上物品,係我自己認為,除咗衣褲鞋襪同個人護理用品之外,一定要帶嘅其他物品,可以有備無患,當然又係可以因應個人需要,而增加或減少.

好多保險公司同銀行,都有得買,而為咗爭生意,都會各出其謀,好似特價或送禮品,雖然保障範圍都係大同小異,不過買嘅時候,千萬唔好貪呢啲小便宜,唔係真係會得不償失.

最緊要揀啲保障夠全面同賠償夠大,同睇清楚賠償規定,點解咁講,因為一般單張,都會大大隻字寫明邊種有得賠償同有幾多賠償,但賠償細節就會另外列明係一般事項度,雖然好長,啲字又好細粒,不過一定要睇清楚,唔係到真係要索償時,至發覺唔夠資格,咁就真係.

一般要注意嘅包括 :

1. 死亡,永久傷殘,醫療等等嘅保障就一定有,不過最好揀賠償額大啲同唔使自己俾墊底費嗰種;又係大吉利是講句,真係有事,醫療等等嘅費用,唔知要幾多嗎.

2. 海外住院現金津貼 - 記得睇清楚,每日賠償額有幾多同最高賠幾多.

3. 取消旅程或旅程中斷 - 如果同朋友一齊去,最好揀啲條款列明"因受保人或其旅遊夥伴死亡,蒙受嚴重損害等等而要取消或中斷行程"嚟買,.

4. 航班延誤 - 咪以為一delay就有得賠,一般都要延誤超過8小時或以上起計,至有得賠.記得要航空公司出信証明,寫清楚原因同延誤咗幾耐,唔係無得索償.

5. 行李延誤 - 同上面一樣.有啲保險公司,會列明每延誤幾多個鐘,就賠償一個指定限額;有啲就會賠償,因無行李而購買的日用品或衣服嘅費用,當然有限額啦.

6. 行李遺失或損毀 - 如果大家打算買啲貴重物品,最好都係尾站購買同hand carry上機,唔見咗雖然有得賠,但係有賠償限額,每樣最多都係賠港幣2000蚊咁上下.

以上幾點,都係一般要注意嘅事項,當然又係可以因應自己需要嚟選擇.

保險單一定要隨身攜帶,因為有乜事,除咗可以攞嚟睇吓有冇得賠之外,亦可以俾人知道你買咗保險.

每張保單內,都會有一個24小時緊急聯絡電話,若果真係遇到不幸嘅事,可以打電話俾佢哋問清楚同尋找幫助.

最緊要仲係,記得保留所有正本單據,証明信件同報告,唔係就會得唔到賠償.

可能你會覺得,搭火車好簡單啫.無錯,係香港就話3或4分鐘,就會有一班,搭錯最多係下個站落番再搭過,唔會浪費太多時間.但係歐洲,要成個鐘或者再耐啲,至會有第二班,萬一真係唔好彩上錯去另一個城市嘅車,唔知去到邊度至有站停,後果就不堪設想.

首先,如果你係買eurail pass,euro pass等等嘅火車証,買時都會有一本時間表贈送,時間表內會清楚列明,每個城市,每日會係邊個火車站度,有邊幾班車開去邊個地方,開車同到達時間,直接到定要轉車,都會一一列明.

基本上,所有國營火車都可以免費乘搭,但唔保証一定有位坐,例如旺季時唔想企成程,或怕通宵車冇哂臥舖,可考慮早1-幾日(睇情況而定)去火車站做定留位,一般費用都係幾蚊歐羅,只要是同一個國家就得,即是你可以在馬德里book或買由巴塞隆納出發的火車.淡季的話,只要揀好想坐的班次,去到火車站,搵啱月台睇清楚目的地無錯就可以隨便開門上車,有時班車會去好幾個地方,只要對清楚就得,再唔係問人都得.開車後,查票員才會逐個查票,所以記得睇清楚至好上車.

不過快車就唔可以免費乘搭,例如大家都熟識嘅:

• 西班牙嘅Alaris, Altaria, Alvia, Euromed, AVE / Talgo200
• 法國,瑞士,比利時嘅TGV
• 法國,英國,比利時嘅Eurostar
• 法國,比利時,荷蘭,德國嘅Thalys
• 法國,意大利嘅Artesia de Jo
• 瑞士,意大利嘅EC - Cisalpino
• 瑞士,意大利,德國嘅Cisalpino
• 意大利嘅Eurostar Italia

• 瑞典嘅X2000

要搭呢類快車,都要係上車前,去辦事處辦理好俾留位費或附加費嘅手續就得,一般由5歐羅至幾十歐羅不等,視乎邊種車;而大家亦可放心,因為時間表度亦會寫明R(圍在正方形內)字樣,等你知道.如果唔想俾的話,可考慮坐慢車(若有提供),當然時間會耐啲.

至於通宵火車,如果想有覺好瞓,當然要做臥舖留位.想慳錢呢,就可以揀啲,圖示有坐位和臥舖兩種嘅車嚟坐;坐位係一個車卡內(西班牙除外),劃分出幾個廂房,每個廂房有兩排對坐,每邊3個位,係淡季時,就可以霸哂成個廂房,將兩邊坐位拉開變成一張床嚟瞓,不過最好係輪流瞓,以免有人偷嘢都唔知.

呢個網址http://www.railsaver.com/overnightfeestable.asp,有哂留位費,附加費同臥舖費嘅價錢,大家可以去睇吓以作參考,去到當地再辦都唔遲.

如果去嘅國家多兼範圍大,買火車証會抵啲,係呢個網址www.eurail.com就會有哂所有火車証價格,查完價錢,再問歐陸旅運27710982同學聯27302800,睇吓邊間平就幫邊間買.

買select pass揀國家時要注意,如果個國家無包括在內,而你架車又會經過時,就要係上車前,去火車站,買咗呢段國家嘅火車票至好上車.

買火車証可以免費或享折扣搭某些遊湖觀光船(如瑞士),渡輪(如意大利去希臘)或巴士(如德國浪漫之路)等等,詳細情形網址有講,買2個月內搭幾多日嗰種火車証時要注意,因呢種証,係你邊日坐火車,就係上車前填好當日日子俾檢票員檢查,當日唔坐火車就不用填日子,但要搭呢種[免費或享折扣]嘅服務時,除非填上當日日子,無填日子就唔搭得,買全月通當然唔受限制.

如只去一兩個國家,可以去每個國家嘅國鐵網址度,計算吓買pass同單程票邊種便宜再作決定,因為好多國家的火車票直接上佢哋個網買都會有特價,如果日期時間都確定唔會改,可於出發前直接上網買.當然去到先買都得,但就冇特價,去前記得查定火車時間同站名,寫低至去買票,可免溝通唔倒而出錯,當然買完後檢查清楚無錯至好離開.

呢個德國國鐵網頁差唔多可以查哂全歐洲的火車時間,大家可以去search以作參考,但當然買火車票就要去返本身國家的國鐵網頁買;另外每年大約12月中都會轉一次火車時間,太早會search唔到,不過基本上變動唔會太大.

意大利國內線同國外線都有特價,詳情可到意大利自助遊-注意事項二睇.

法國國內線同國外線都有特價,詳情可到法國自助遊-注意事項睇.

西班牙國內線來回同部份國外線有特價,詳情可到西班牙自助遊-注意事項睇

德國國內線同國外線都有特價,詳情可到德國自助遊-注意事項 睇.

瑞士國內線同國外線都有特價,詳情可到瑞士自助遊-注意事項睇.

荷蘭國外線有特價,詳情可到荷蘭自助遊-注意事項睇.

比利時國外線有特價,詳情可到比利時自助遊-注意事項睇.

奧地利國外線有特價,詳情可到奧地利資訊和旅遊點網頁睇. 

上網自行買票好似好煩,其實只要按住指示嚟做就得,最緊要係買到特價票比用pass慳好多.

歐洲火車,好鬼準時,絕少誤點,所以唔好遲到,最好預早到達,因為大嘅火車站,都會有好多個月台,有啲仲有兩層,太遲去到,搵得嚟都趕唔到.早啲去到,首先睇吓個大型時間牌度有冇你班車出現,未有唔緊要,每個站都會有一塊塊板擺喺度,貼住1日嘅時間表,分出同入,只要搵到出站時間表,沿住開車時間嚟搵,就會見到你班車,幾點喺幾號月台開,又由於你嘅目的地,未必係尾站,所以只要搵啱開車時間,望清沿途有冇你個目的地就會易啲.

搵到邊個月台開後,去定月台度等,望住個大型時間牌,等佢打出資料;而每架火車外都會有個牌,寫明班車係由邊度去邊度,沿途會停邊個站,核對無誤再上車就萬無一失.

車廂外會寫明1或2,1當然係頭等,2就係2等.

每個月台都會有個自己嘅火車組合圖,列明唔同目的地嘅車,頭等車廂係月台邊個位置,而月台會分ABCD段,唔好攪錯.因為有啲國家,好似西班牙嘅小鎮,一個月台會有兩班車係度一齊等,AB段嘅火車去呢度,CD段嘅火車就去第二處.

上到車後,廂房嘅就睇吓門口個牌,坐位嘅就睇吓坐位上邊個牌度,有冇"reservations"呢個字,有即係個位有人留咗,唔坐得.

每個車卡都會有一個廁所.

車卡間會有門隔住,要過就要自己拉開度門.

長途車會有餐車,短途嘅就會有人推住架手推車嚟賣飲品同小食,當然價錢昂貴,所以最好去超級市場買定.

差不多到達時,火車會慢慢埋站,此時就要睇清楚個站名是否正確至好落車.好似由布拉格到維也納,會先到Wien Simmering站,再到Wien Sudbahnhof站,咪見到Wien以為到咗,就即刻落車.

其他坐火車細節,可到網誌內-歐洲自助遊-我得你都得5(坐火車)參考.

因為歐洲嘅建築物,仍然保留住中古世紀風貌,就算有升降機,都係舊式要人手開關度門嗰種;物價更是高昂.摩天大樓就無乜啦,古堡,皇宮,教堂,花園,廣場,舊城區就大把.

所以去歐洲玩之前,要有定心理準備,唔使要有三從四"德",一"得"就夠.

一係捨得,不問價錢,唔理幾貴,每餐都去餐廳食,兼住宿四或五星級酒店,仲要有埋門僮幫手拎行李.

唔捨得,就要捱得,出發前帶定杯麵同米做晚餐,去當地嘅超級市場,買定一大包麵包(平過麵包店買)做早午餐,礦泉水都唔買,自己煲水飲,順便買埋蔬菜同肉食,返青年旅舍自己煮晚餐.最緊要揀啲有煮食設備嘅青年旅舍嚟住,仲要住最平嗰隻,得張床同儲物櫃嘅大房;冇煮食設備至住雙人房,因為可以係房度靜雞雞煮,當然要揀無獨立浴廁要用公共嗰種至平.

睇完之後,係咪覺得好慘呢,去旅行啫,使唔使攪成咁.

其實,如果覺下係屬於驕生慣養嘅學生或年青人,乜都旨意父母幫忙,唔知搵食艱難,又唔會幫手做家務的話,就應該用捱得嘅方案,因為可以體驗生活兼磨練自己,唔好再咁倚賴.

如果覺下係同我一樣,單身一族,無乜負擔,咪豪些少,用齊兩個方案囉.

住宿方面,如果唔想住青年旅舍,通常火車站附近,或行遠些少,都會有大量平價旅館.最好當然係出發前,上定當地嘅旅遊網,搵定邊度有最多平價旅館,去到再慢慢搵,最多浪費些少時間.

至於食囉喎,唔想餐餐捱麵包,有啲大型超級市場,會有熟食買,好似完隻燒雞,香腸等等.特別係燒雞,周圍都有商店,一隻隻掛哂喺度,一邊燒一邊買;再唔係,咪食多幾餐麥記囉,最多去前同返嚟後唔食,間唔中至去餐廳食餐好嘅.

或者好似我咁,早餐食麥記或者買份三文治,午餐就去餐廳食好啲,晚餐唔食,早啲瞓,反正當地嘅晚餐時間,已經係香港嘅半夜2點幾,2點幾啦,仲唔瞓會有熊貓眼,影相唔靚.如果驚半夜餓醒,可以買定麵包餅乾,不過呢個情況應該好少發生,因為玩咗成日已經倦到嘔,肯定可以一覺瞓到天光至醒.

首先應該問問自己和同伴,究竟大家想要啲乜,預早攞個共識,以免訂哂機票,搞到一半時,你話咁,佢又要咁,各有主見,未去已經面左左.

最慘仲係,出發前講好行程,大家無異議,以為ok無問題,去度至出事.

我亦曾經試過,朋友搭朋友,帶多三個唔知乜水嘅人,一齊六個人去(人多都係煩),我都驚大家會有分歧,訂機票前已講明,只去意大利,呢度處處都係古蹟和博物館,當然有排睇唔使去第二個國家,加上商店櫥窗都一樣咁精彩,邊遊覽邊shopping就最好不過,就算入博物館或美術館參觀,睇完重點推介,繞場一周後就閃,我嘅行程係威尼斯入,羅馬走,只帶兩至三件衫去,著完就掉,再買過啲新嘅嚟著,咁就唔使影出嚟啲相,來來去去都係個幾件.咁嘅編排,簡直.問清楚哂,大家都無問題先訂機票出發.

初頭幾日,嗰三個唔知乜水嘅人,已經係度阿支阿左,我都,唔,費事另一個朋友難做兼無面.

一去到博物館,繞場一周後,當我話閃時,嗰三個即刻嚟料,話未睇完唔肯走,原來所有物品對佢哋嚟講,都係重點,差在未逐樣驗屍咁驗.當堂,但又唔想同佢哋,點算好,唯有叫佢哋自己留低慢慢睇,教埋佢點樣搭車返旅館,我哋走先去shopping囉.

咁都未算煩,返到旅館,嗰三條友又話,唔去巴黎,等於無去過歐洲,又話反正無買火車証,去邊都得啦.之後就叫我教佢哋自己去,重原來已經早有準備,帶埋去巴黎嘅旅遊書嚟,我同另外兩人,當然樂意之致.

第二日拿拿聲同佢哋去火車站,買定當晚夜車嘅車飛;玩到咁上下,一夠鐘,即刻送埋去火車站,打發佢哋走,唔使再煩.

你話呀,去之前已經講清講楚,有問題又唔出聲.

自此之後,我都只會同相識嘅朋友去,其他無聊人,一律免問,點解,因為如果去到中途,佢哋敢出聲話唔滿意個行程,我可以,無面俾,唔使就住.

大家都知,歐洲國家致力於環保,所以每樣嘢都以環保為大前提,例如:-

• 自動扶手電梯-初初見到,一條條自動扶手電梯,停哂喺度,又唔郁,唯有望梯輕嘆,點知原來係要踏上去至會郁,攪到我玩咗幾次至捨得走,好彩無俾人責罵.
• 自動關電燈-當你進入洗手間時,要自己開燈,不過有時間限制,到咁上下就會自動熄,點算,再開過囉,電制度有盞燈仔,唔駛驚搵唔倒,時間亦足夠小解有餘,怕黑或打算辨大事,就最好帶定手電筒.瑞士有啲青年旅舍,直頭連沖涼房都係,搞到沖沖吓要行返出去開燈,不過好在我唔怕黑,可以繼續沖,話之佢.而喺巴黎,你會見到一個個放在街上的洗手間,入錢後就會自動打開,同樣一夠鐘就會自動打開,話知亦唔會知你攪掂未,所以辨大事就千萬唔好用,唔係坐坐吓突然開門就該煨囉.
• 環保廁紙-有部份質料十分之粗和"鞋",簡單啲講,即是好似舊時用嘅草紙或習字紙咁,故此如果可以嘅話,最好帶定卷廁紙和紙手巾自用.
• 手動開門-之前已經提過,就是大部份嘅巴士,地鐵,電車,火車嘅門,都要自己開,咪以為度門壞咗.

點呀,係咪真係好神奇呢,喺度真係好佩服歐洲人,可以諗出咁多嘢來身體力行,支持環保.

想當年我都只係攞住本XX闖西歐就胆粗粗帶埋朋友一齊出發,既然我都可以由一個旅遊白痴變到可自己計劃行程,兼帶埋朋友一齊穿梭於歐洲各大小城鎮,真係我得點解你唔得.

我成日喺度推介,大家請勿誤會,我唔係歐洲旅遊大使,亦唔係嗰本書嘅作者或出版商,只是工作咁辛苦,繁忙,日日要戴住假面具去對住啲蠻不講理的同事,上司和老闆,最慘係自己做錯嘢仲要聲大夾惡,發覺是自己錯時就當無事發生扮失憶.你話如果唔去旅行放鬆一下心情,放低埋個假面具relax吓,真係好易做到人都癲兼思覺失調.

好多人會辭工揹住背囊去玩一,兩個月至返,其實咁樣真係幾辛苦,我覺得最理想是去12-18日,玩一至兩個國家,又唔駛辭咗份工,攪到玩完返嚟要再揾工,又唔怕會有思鄉病.

如打算散買火車票唔買火車証,就可以去每個國家嘅火車公司網址度,查定火車時間同站名,寫低至去買票,可免溝通唔倒而出錯,當然買完後檢查清楚無錯至好離開.

或者,如果日期時間都確定唔會改,可於出發前直接上網買,有些國家會有特價票.意大利特價車票,國內線去到網頁票價種類時揀AMICA,國外線就揀smart,買完列印出來帶埋去上火車就得,記得帶埋買時個張信用卡,雖然佢未必睇,不過以防萬一.佢嘅網址http://www.trenitalia.com/en/index.html.

法國就國內外都有,不過買咗之後就冇得更改,佢嘅網址http://www.tgv-europe.com/en/home/,佢有兩種攞票方法,一係電腦自行列印,二係攞住張買票時用嘅信用卡同send俾你嘅confirm email,去當地售票機或櫃台度攞.

除咗旅遊書同上網可以搵到目的地資料外,有些當地的旅遊局更會樂意郵寄一些當地的資料給遊客參考,故此上網做資料搜集時,記得睇清楚有冇呢個服務,有就記緊要求他們寄一份給你.亦可在當地的旅遊資訊中心度詢問和找資料,佢嘅標誌係I,好易認.

最後要再提提大家就是相機問題,如果打算上雪山或要過白色聖誕,記緊檢查清楚部相機是否能抵禦寒冷天氣,若果唔係,就要好似我咁,將部相機貼身收藏,俾啲溫暖佢,要影相時才攞出嚟,影完又要即刻收返埋以免冷親.雖然依家啲相機好先進,未必再有這種情況出現,但唔怕一萬,至怕萬一,所以都係檢查清楚穩陣啲.

今次繼續講吓點樣喺歐洲度生存(生活):

• 成日提住啲百貨公司要大家記住,除了可以shopping外,另一方面就是百貨公司內有免費洗手間,可以慳返啲.除此之外,博物館和美術館亦是另一選擇(當然是在參觀時).
• 雖然有部份國家可以直接飲用水龍頭啲水,但你會發覺啲水有層好似灰的沉澱物,為免水土不服,都係買礦泉水飲好過,雖然歐洲啲物價指數比香港高,唯獨礦泉水價錢同香港差不多,有啲仲平過喺香港買.除此之外,鮮果汁是另一個選擇,種類繁多,有時更比礦泉水平.
• 除咗礦泉水,朱古力亦一樣,何況依家啲歐羅仲升到咁高,所以去前最好夾定價,唔係拎餐死仲要俾人笑你買貴咗.學我咁買啲香港無又平到笑嘅牌子就萬無一失.
• 西歐有部份麥當勞茄汁是要另外俾錢,所以佢會問你要唔要,所以記得問清楚.
• 之前提過住宿問題,雖然青年旅舍價廉物美,但多數遠離市中心和旅遊點.
• 有個叫Easy Hotel嘅集團,標榜自己的酒店平靚正,係瑞士Basel同Zurich,英國London同Luton,匈牙利Budapest都有分店,冇嘅都可以幫你search,有興趣可以去網頁睇吓http://www.easyhotel.com/home.htm
• 若果唔介意而又想探討一吓當地民生,前往東歐時可考慮入住民宿,通常啲市民會帶定本相薄喺火車站等待,見你係遊客就會埋嚟推銷.
• 冬季嚟旅行,記得一定要帶潤膚膏,潤唇膏和潤喉糖,因所有室內場所均會開行暖爐,若果無帶,第二朝瞓醒皮膚就會龜裂.
• 如果要洗衫,青年旅舍,旅館和酒店都會有此服務,亦可以幫襯自助洗衣店,再唔係,自己洗完放近暖爐(唔好太近,否則會著火)等佢慢慢晾乾,既可慳錢,又可等個暖爐有水抽就唔駛抽到自己變人乾.
• 過馬路要小心,呢度同香港唔同,行車方向係左落右上,英國至係左上右落,記得望清楚至好過.
• 超級市場的購物手推車是一架架鎖住,就好似湯漢斯Tom Hanks套The Terminal一樣,只要放入硬幣便可使用,離去時將它推回原處鎖返好,個硬幣就會自動退出.

講咗咁多都應該齊哂無遺漏,希望本人嘅拙見會對大家有用.

*大家都知礦泉水分有氣和冇氣,買時要睇清楚,亦可問是否no gas,佢哋就會明白.

*公共電話亭隨處可見,要打長途都好方便,如打算帶手提電話就要留意,喺度(其實全世界)所有電話均沒有來電顯示,如果唔想蝕長途電話費,可先去所屬的電話公司度申請番嗰外地的來電顯示服務,一個月大約三十幾蚊(當然唔同公司有唔同收費).

*付費上網服務亦是隨處可見,除了酒店大堂外,咖啡店,文具店或小型賭場(只得角子老虎機)都有,有些更是獨立一間商店,有埋Printer可以列印.

*小型賭場都喺隨處可見,不過小賭怡情.

*想買紀念品就要留意,我國偉大,好多東西都是由它制造兼可能廟街,女人街和花園街都買到,再加上貿易發達,香港亦可買到歐洲的產品,故此最好夾定價先.可考慮購買海鮮罐頭食品,如蠔,檉子,青口,八爪魚等等做手信,不過最好買罐試吓啱唔啱食,不過要小心行李過重.

*大部份公共交通工具都係自發性俾錢,如巴士和電車,先在報販或煙檔處買飛,上車後再自行於車上的印票機內打上時間.至於地下鐵,有部份國家的入閘口唔似香港咁有度閘擋住,只是喺入閘口前有部印票機,打上時間後便可直行直過,咪諗住偷雞(貪小便宜)唔俾錢,車上會有便衣檢查員,無飛就會即時罰錢,遊客都無情講,所以千萬不要因小失大.

*巴士,電車和地下鐵的車門都要自己按制或用手打開(並不是自動).

*基於節約能源和環保關係,有啲自動扶手電梯當冇人用時會自動停(壞咗唔算),當有人行上去便會自動開行.

*每個廣場,公園,教堂前,除咗滿佈遊客外,亦都滿佈白鴿,仲要隻隻都肥屍大隻,咪諗住餵佢哋玩吓兼影相留念,因一開始它們便會全部一齊飛撲埋嚟,跟住就只好慘叫和掉低食物走人,唔信可以試吓.至於喺湖畔的天鵝,水鴨和鴛鴦亦一樣,除非離遠餵.

今次同大家分享一吓購物的樂趣,打算瘋狂掃貨的話就要小心留意:

• 同一日於同一間商店,百貨公司或連鎖店內購物至一定限額(多數是一千元以上)而該店舖是有參與退稅計劃(通常門口會貼有退稅Tax Free標誌,亦可詢問店員),就可申請退稅,雖然退稅單上列出會有16%或以上的退稅,但是要俾手續費給退稅公司,不過都有大約11%或以上的退稅(不同國家會有不同的稅率),食物是沒有退稅的.買完後話俾售貨員知你要退稅,佢就會幫你辦理,有些售貨員會問你要cash定退落credit card,有些會唔問就幫你揀,所以最好話定俾佢知你要cash,不過有些商店如LV,就一定是退回去信用卡唔可以要cash.辦理好後售貨員會給你一份已填好的退稅form同一本教你點做退稅的小冊子俾你睇,離去時於機場custom counter內將退稅form給海關人員蓋印就ok啦.順帶一提,有啲售貨員會只填銀碼,其他資料如姓名地址之類乜都唔填就俾張form你,唔使驚,返到酒店再慢慢填就得啦,有啲仲會問埋你酒店名稱,雖然唔使填落張form度.
• 連鎖店的意思是指同一個品牌的店舖,例如西班牙的Zara,瑞典的H&M或是意大利的Benetton,同一條街都會有兩間喺度,如果喺第一間買唔夠數,可去第二間再睇過,買完後再將所有單據交給店員辦理,當然要係同一日內至得;在大型百貨公司購物,是買完所有物品後,集齊所有收據才一次過前往退稅櫃位辦理,當然亦是要在同一日內;同樣地職員會將填好之退稅form給你自行於離去時給海關蓋印.順帶一提,如在百貨公司內購買名牌如LV,是在百貨公司的LV內辦理,不是在百貨公司自己的退稅櫃位辦理,當然售貨員會即時幫你做唔使你操心.

玩完要離開時,記得集齊所有退稅form俾海關蓋印唔好漏,因為沒有海關蓋印係攞唔返錢的,依家講吓大概做法 :

• 在瑞士,某些大型的鐘錶店(如買勞力士的指定商店)是會即時在付款中將退稅退回給你,雖是這樣,於出境時記得要辦理好退稅手續,如果唔係,間公司會經信用卡公司向你追回所有退稅款項.由於瑞士並不是歐盟成員,故此離境時不要忘記做好退稅手續,否則就不能取回退稅.如坐火車出境就要密切留意,因海關有可能會唔上火車查證件,如發覺火車停下就要注意,一看見海關人員就要立即將單據給他蓋印.如坐飛機出境,是在過關後於禁區內的自動櫃檯中辦理,只須依照指示做便可以,無論所購買的是否貴重物品,海關有可能會出來要求查看所購物品,故謹記不要寄倉(當然,咁貴亦唔好寄倉),詳細情形可以去網頁http://www.myswitzerland.com.hk/tourism/aindex.asp?c1idx=20,於快樂購物Select箭咀內揀Tax Free and Global Refund睇吓.
• 如在歐盟成員國購物,就要離去時於最後一站一次過辦理.辦理退稅時海關會睇埋你個PASSPORT,機票同所購物品,証明你離開同係攞走至會幫你係退稅form內蓋印.我就試過由布拉格坐飛機去巴黎,玩完至返香港,諗住睇吓可唔可以CHOP咗先,當然佢好醒目話我知要喺巴黎做,如果驚唔識分邊個已入歐盟(特別係東歐),可以有理冇理都去海關試吓,佢就會話你知.如果坐法航由羅馬經巴黎轉機返香港,就係羅馬機場辦理退稅,如果去到巴黎至搞,就要攞埋啲戰利品上機唔可以寄倉,如同上面所講,海關有時會要求出示所購物品.

不同國家有不同的退稅手續,所以記得看清楚商店所給與的退稅小册子.

如果係繁忙機場做退稅,好似倫敦同巴黎,就緊記早些少到機場辦理,因為好多人,撞正成團人喺處時就真係唔知排到幾時.

**特別一提,如果即時取回現金,係要另外再俾手續費間找換店.

意大利羅馬是要在航空公司櫃檯辦理完登機手續帶同登機證才可辦理退稅手續,記得同航空公司職員講要辦理完退稅,去到退稅counter辦理完後,再把行李於此寄倉.而Cash Refund就在禁區內.不過每個城市會有唔同做法,好似都靈係搞完退稅先去航空公司櫃位辨CHECK OUT,所以最好去到機場再睇點做.

唔好以為反正要將退稅物品給海關檢查便索性著咁啲喺身唔使揾,所有退稅物品是要新買和沒有用過才可以的,就算著都唔好喺走嗰時著,化妝品同護膚品都係,除非佢唔睇,好似我都唔係次次CHECK,睇吓好唔好彩.

用剩的紙幣可帶回香港於銀行對換,硬幣銀行是不會對換的,故此應盡量用哂所有的硬幣.

做退稅時最好扮到好似所有貨品都會寄倉,我就試過由羅馬經倫敦返香港話佢知會HAND CARRY上機,海關唔肯CHOP要我去到倫敦機場搵海關再CHOP,呢次之後,我就次次都將所有嘢擺哂入喼度搞退稅,搞完先拎返出嚟上機.

呢張係幾年前嘅退稅單副本,俾大家參考,你會見到V.A.T要成19.6%,但實際只會退番約12%俾你 :