文章分類: 歐洲自由行-捷克 (我要活出精彩的人生)

捷克自助遊-注意事項

lolo2007 — Mon, 16 Jun 2008 22:36:48 +0800

雖然佢已加入歐盟,不過依家仍然用緊自己貨幣,就係Czech Crown,簡稱KC,聽聞2012年就會轉用歐羅.可以去到當地銀行對換,可用歐羅,英鎊或瑞士法郎等歐洲貨幣對換,港幣係無得換,對換時唔好換太多,最好計清楚大約要用幾多錢,因為用唔哂攞返去銀行換會蝕差價.

插頭同西歐一樣,兩腳圓頭,230V.

去歐洲,可能你都會想試吓睇歌劇,來到布拉格,除此之外,仲有好多唔同的文化節目可供選擇,最重要係平好多,雖然有部份講捷克話.

布拉格 :

機場名叫Ruzyne,機場網頁.由機場出市區最平嘅方法係,坐119號巴士去到Dejvicka再轉地鐵,行李都要買飛,所以最好去counter買,寫底目的地兼俾埋件行李佢睇,大約40幾KC.另一個方法係,坐mini bus直接去到火藥塔後一條街V Celnici落車,但價錢就貴一倍有多,同埋行李size有限制,太大件會要求另外俾錢book車,詳情可以去Cedaz網頁睇.
長途巴士Florenc站,位於地鐵B同C線交匯,可以係度坐巴士去Brno,Plzen/Pilsen同Karlovy Vary(又叫Carlsbad),其中去Karlovy Vary嘅巴士都會途經機場,價錢都ok,如果住係度附近可考慮,詳情可以去Megabus網頁睇.除咗呢3個城市外,仲有巴士去Cesky Krumlov,Ceske Budejovice同其他歐洲城市,不過由其他巴士公司經營,想check時間表,可以去IDOS網頁度check,佢會show哂火車同巴士時間表出嚟俾你睇,仲有埋價錢,方便比較,買飛就可以去到至買.
一年一度嘅布拉格之春音樂會Prague Spring Int'l Music Festival,網頁http://www.festival.cz/en/
全年無休嘅仲有,木偶劇Puppetry或黑光劇Black Theater,走在舊城街頭,都會見到一間間劇場有得睇,可即時購票.想睇歌劇,音樂會,芭蕾舞等等,可到國營旅行社Cedok或酒店櫃台購票,有時走在街上,仲會見到啲人著到成個莫札特咁喺度推銷,不過我未幫襯過,所以唔知真定假,所有詳情都可以去網頁參考.
舊城廣場旁聖尼古拉教堂位於Parizska街(打直嗰條),這是名店街,無錯,LV就喺呢度.

華夫斯基廣場兩旁銀行,商店和酒店林立,亦是shopping好去處,街上有一個個的小食亭,專售一條條大型香腸連麵包,再加一杯啤酒,當地人便是以此為午餐,不妨試吓,不過找錢時最好數清楚無錯至好走,我就試過找小咗,返轉頭問佢,佢就一邊講,雖然唔知佢講咩,但睇表情應是無理由小咗喎,但佢依然俾返我,即是佢真係找小咗俾我啦.

由華夫斯基廣場盡頭Na Mustku街行去舊城,其中一條橫街Havelska,內裡有個露天市集Havelske Trziste,除咗食物外,仲有木製玩具,木偶公仔等等精品,記得講價.

其他 :

鍾意水晶手飾或擺設嘅朋友要注意,嚟到當然要買返啲做手信或自己收藏,週街都有舖頭出售Bohemia波希米亞水晶和玻璃,玻璃當然平過水晶,不過佢啲水晶又冇天鵝仔咁貴,睇中不妨買返啲留念.順帶一提唔好喺度買天鵝仔(因是入口貨),價錢同香港差不多,仲貴過喺法國買,我就係買完以為執到寶,去到巴黎至發覺巴黎仲平,真係呻笨都太遲.
木製玩具和木偶公仔都是另一種的手信選擇.
如果有興趣浸溫泉,可到最出名的Karlovy Vary,從布拉格坐巴士大約2小時便到,唔浸亦可試飲溫泉水和買返啲溫泉餅做手信,網頁http://www.karlovy-vary.cz/en/.

官方旅遊網頁http://www.czechtourism.com/

其他要注意的一般事項,可到網誌內'歐洲自助遊-我得你都得'中參考.

布拉格住宿坐車好介紹

lolo2007 — Mon, 28 Jan 2008 00:09:32 +0800

每年都有好多遊客到訪布拉格,所以在這裡,高價以至平價嘅住宿都有好多,舊城區同華夫斯基廣場一帶,梗是遍佈酒店.

依家,我介紹一間俾大家參考,由於我三次到訪布拉格,都是住在這間旅館,感覺唔錯,房間亦很乾淨整潔.

名叫Junior Praha Hotel,地址是Senovazne Nam. 21,價錢雖然唔算太平,但鄰近中央火車站同舊城區,除咗去城堡要搭車外,其餘旅遊點,行路去就得,車錢都可以慳番.

從中央火車站出來,會看見一個小型公園,穿越公園之後,過馬路,再沿Jeruzalemska街一直向前行至尾,去到電車路後,右轉再直行,大約行2-3分鐘,便會看見好大個Hostel招牌,行入去便是.可到它的網址查詢http://www.junior-hotel.info/.

你可能會好奇怪,明明是Hotel,點解個招牌叫Hostel,因為佢有兩座大廈,接待處右面嗰座係Hostel,左面係Hotel.

Hotel內的房間,全是獨立浴廁,包早餐,價錢當然貴好多,而Hostel內的房間是沒有獨立浴廁的,價錢當然平啲,好似唔包早餐,入住時記得問清楚.

旺季時最好預早book定.

Hotel嗰座嘅地低,是保齡球館和餐廳,食物都ok,價錢亦唔算太貴.

而早餐,就喺接待處後面嘅餐廳度食.記得第一次去食時,見到成班警察坐哂喺接待處度,幾驚,以為有乜事發生,原來未夠鐘,餐廳未開門,佢哋等緊入去食早餐,連差人都係度食早餐,所以我諗呢度應該唔會有小偷,所以三次都住呢度.

而佢Hostel嘅價錢,可能比其他貴,但接近火車站,方便一早搭火車,又近旅遊點,由此行番出去,便是地鐵Mustek站同華夫斯基廣場,這裡有一間超級市場,方便購買糧草.

另外,係布拉格市內搭乘公共交通公具,行李都要買票,車票係地鐵,巴士同電車共用,可以係地鐵站內嘅自動售票機或售票員處購買,亦可係站內嘅報販或小商店度購買;最好買定多一張票回程,咁就唔使週圍搵.上車前記得自己打飛印時間,唔係俾人捉到就當無票要罰款,單程票都有20/30分鐘同75分鐘2種俾你選擇,詳情可去網頁睇http://www.dpp.cz/en/travelling-in-prague/.

如果要買火車票,最好係上圖嘅旅遊服務中心度購買,因為佢哋啲英文好過火車站入面啲售票員,唔使驚雞同鴨講.出火車站轉左再轉左就係.

優雅古城-Brno布爾諾

lolo2007 — Thu, 01 Nov 2007 07:48:37 +0800

它是捷克第二大都市,亦是最重要的工業城,從布拉格坐兩個半鐘火車便到,出火車站直行約5分鐘,便會看見Zelny Trh露天市場,有興趣可在這兒買點新鮮蔬果,亦可到旁邊的百貨公司連超級市場行吓.Parnas fountain - 市場中央巴洛克式的噴泉Moravske Zemske Muzeum摩拉維亞博物館 - 位於市場旁邊,是捷克第二大博物館,內裡收藏著摩拉維亞的珍貴文化遺產和歷史遺跡.另一面是The Reduta Theatre.

離開市場後,到處亂逛,街上滿是別緻的建築物,一路行一路影相一路shopping兼一路食嘢,哈哈,幾咁消遙自在.可惜,返到香港又要捱騾仔!!!!!

有興趣可到www.brno.cz找資料.

酒不醉人-Plzen/Pilsen皮耳森

lolo2007 — Wed, 31 Oct 2007 23:26:33 +0800

它所製造的啤酒是捷克三大名酒之一,亦是世界知名,但係對我嚟講就有如入寶山空手回,我都唔飲酒嘅(啲啤酒真係苦到嘔,工作已經苦過dee dee,仲要飲啲咁苦嘅酒,我情願食朱古力肥死好過),不過它的景色卻能令我醉倒.

從布拉格坐火車,大約兩個鐘就到,佢個火車站都好別緻,由這裡向西北方向慢慢行,穿過Radbuza河便是市中心的舊城區原本條河無乜特別,不過細心啲望吓,面層凍到結咗冰,凍到架貨車都貼埋牆?沿途見到呢座青綠色的建築物,令我諗起Keroppi.

共和廣場Nanesti Republiky兩旁的建築物,不單色彩鮮艷,仲俾我見到有間中國餐館,即刻拿拿臨走去醫肚,一來可解思鄉之情,二來可以幫襯返自己人,真係估唔到,呢度都會有中國餐館,我吔中國人認真犀利.猶太教會堂Velka Synagoga.

有興趣可到http://info.plzen-city.cz找資料.

藝術之城 - 布拉格Praha

lolo2007 — Sun, 07 Oct 2007 08:36:51 +0800

它尚有個美譽-金色的布拉格,點金法,請看頁頂嗰Logo.

主要分兩個遊覽區,就是舊城區Stare Mesto和城堡山區Hradcany.舊城區位於中央火車站Praha Hlavni nadrazi前,最好在這兒落腳,因高,中級酒店,廉價旅館和青年旅舍均可在這裡找到,又近旅遊點.

如坐火車便要注意,國際列車進出的車站分中央火車站和Praha Holesovice Zast(位於郊區,可在此坐地鐵至中央火車站),唔好攪錯.

坐飛機或巴士嘅入城方法,網誌內"捷克自助遊-注意事項"呢篇有詳細講解.

人來人往的華夫斯基廣場Vaclavske Namestiesti,華夫斯基銅像後是國立博物館Narodni Muzeum,網頁http://www.nm.cz/?xSET=lang&xLANG=2

火藥塔Prasna Brana和它的鄰居人民文會館Obecni Dum,網頁http://www.obecnidum.cz/web/en/homepage;從這裡沿Celetna街行,街道兩旁滿是售賣紀念品的店舖,直行到尾,便是

舊城廣場Staromestske Namestiesti左手邊白色外牆青銅色尖頂的是聖尼古拉教堂Kostel sv. Mikulase,教堂旁的大道便是名店街.

廣場上的Pred Tynem迪恩教教堂

廣場旁邊舊市政廳Staromestska Radnice,大樓外是個大型的天文鐘,每到整點,鐘頂的兩隻窗便會打開,一旁的死神開始鳴鐘,而耶穌的十二門徒會在聖保羅的帶領下一一從窗前走過,最後以雞啼結束,每次均聚集無數人在觀看,有興趣可在大樓坐電梯或步行上鐘樓頂觀看.從天文鐘前方向右行至Karolva街,去到街尾便是查理大橋Karluv Most,

橋嘅兩邊各有一座塔,橋上總共有30尊聖像,網頁內有哂資料http://www.charlesbridge.cz/guide.html 橋的一面是與它相對的布拉格城堡Prazsky Hrad另一面就 .

去城堡山,最好是買張75分鐘嘅票(可於有效時間內轉車,記得自行打飛),坐地鐵去到Malostranska站再坐電車上山由側門入,就唔使行上去咁辛苦,側門一樣有守衛看守, 城堡正門入口內的廣場上,每天也有守衛換班交接儀式,供遊客參觀.城堡內Katedrala sv. Vita聖維特教堂,城堡網頁http://www.hrad.cz/en/prazsky_hrad/navsteva_hradu.shtml.

離開城堡向前行,便會看見Loreta教堂,網頁http://www.loreta.cz/en/index.htm.

地鐵站-好像裝雞蛋用的紙皮.

有興趣可以去網頁睇吓http://www.prague-info.cz/en或http://www.visitprague.cz/main.php3

華燈初上的布拉格城堡

lolo2007 — Sat, 06 Oct 2007 08:39:41 +0800

大家有冇見倒頁頂張相,係咪好靚呢?唔靚,嘻嘻,業餘水準,係咁上吓,多多包涵.正所謂'讀萬卷書,不如行萬里路',現在啲機票仲咁平,猶記得我十幾年前第一次去歐洲,買張星航都要七千幾,現在只是六千幾已可買張直航機票,真係低.

你可能會話年紀大,點學啲後生揹住背包週圍去,錯,邊嗰話一定要揹大背包,拉喼咪冇咁辛苦,我仲常常遇到啲好心人幫我手托上托落.

我覺得秋天和冬天去歐洲最好,天氣冇咁熱兼不是旺季外,找平價酒店都易啲.冬天去布拉格就最好,雖然好鬼凍,但是會落雪兼日短夜長,4點幾己開始天黑,可以早啲影完夜景去食飯.夏天要等到8點幾9點先開始天黑,真是等到發呆,兼且是旺季,遊人多,平價酒店難搵,仲可能分分鐘搵唔倒,人多連影相都人頭湧湧,好像去咗嘉年華.

其實幾時去都無所謂,最重要是難得輕鬆.